சினிமா செய்திகள்
பாய்ஸ் 2-வை கையில் எடுக்கும் சித்தார்த்.. வெற்றி கிட்டுமா?
ஷங்கர் இயக்கத்தில் கடந்த 2003ம் ஆண்டில் வெளியான படம் பாய்ஸ். ஷங்கரின் அபார வளர்ச்சியில் முதன்முறையாக சறுக்கலையும் ஏற்படுத்திய படமும் இதுதான்.
இளைஞர்களுக்காக புதிய டிரெண்ட் செட்டராகவும், இந்த படம் திகழ்ந்தது. தியேட்டர்களில் படம் ஓடவில்லை என்றாலும், இந்த படத்தை பார்க்காத இளைஞர்களே இருக்க மாட்டார்கள் என்ற அளவுக்கு படத்தை அற்புதமாகவும், இளைஞர்களுக்கு பிடித்தவாறும் இயக்குநர் ஷங்கர் இயக்கியிருந்தார்.
படத்தில் இடம்பெற்ற அத்தனை பாடல்களும் ஆல்பமாக மாபெரும் வெற்றியை பெற்றன.
2ம் பாகங்களின் காலமாக தமிழ் சினிமா தற்போது மாறியுள்ள சூழலில் பாய்ஸ் 2ம் பாகத்தையும் எடுக்கவுள்ளனர்.
இந்தியன் 2 படத்திற்கு பிறகு ஷங்கர் இதனை இயக்குவாரா என சித்தார்த் அணுகியதாகவும், ஆனால், ஷங்கர் இதனை இயக்க ஐடியா இல்லை என்று கூறியதாகவும் தகவல்.
இதனால், தமிழ்படம் இயக்கிய சி.எஸ். அமுதனின் உதவி இயக்குநர் மகேந்திரன் ராஜாமணி, பாய்ஸ் 2விற்காகன முழு கதையையும் உருவாக்கி இயக்கவுள்ளதாக செய்திகள் வெளியாகியுள்ளன.
இந்த படத்திற்கு பாய்ஸ் படத்தில் நடித்த தமன் இசையமைக்கவுள்ளார்.
சித்தார்த் மற்றும் தமன் இருக்கும் புகைப்படத்தை வெளியிட்ட தமன், பாய்ஸ் 2 என பதிவிட்டு, இளைஞர்களை உற்சாக மோடுக்கு மாற்றியுள்ளார்.
தொடர் தோல்விகளை சந்தித்து வரும் சித்தார்த்துக்கு பாய்ஸ் 2 மீண்டும் கம் பேக்காக அமையுமா என்பது படத்தின் ரிலீசுக்கு பின்னர் தான் தெரியும்.