சினிமா செய்திகள்
பொங்கல் ரிலீஸில் திடீர் திருப்பம்: ‘வலிமை’யுடன் மோதும் விஷால் திரைப்படம்?
வரும் பொங்கல் தினத்தில் அஜித்தின் ‘வலிமை’ திரைப்படமும் பிரபாஸின் ‘ராதே ஷ்யாம்’ திரைப்படமும் ரிலீசாகும் என்று கூறப்பட்ட நிலையில் திடீரென விஷாலின் திரைப்படமும் இணைந்துள்ளதாக கூறப்படுவது திரையுலகில் பெரும் பரபரப்பை ஏற்படுத்தி உள்ளது.
ஜனவரி 7ஆம் தேதி எஸ்எஸ் ராஜமவுலி இயக்கத்தில் ஜூனியர் என்டிஆர் மற்றும் ராம் சரண் தேஜா நடிப்பில் உருவான ’ஆர்.ஆர்.ஆர்’ படம் ரிலீசாகும் என அறிவிக்கப்பட்டு இருந்தது. ஆனால் தமிழகம் உள்பட இந்தியா முழுவதும் திரையரங்குகளுக்கு கட்டுப்பாடு விதிக்கப்பட்டதை அடுத்து ’ஆர்.ஆர்.ஆர்’ திரைப்படம் ரிலீஸ் தேதியை ஒத்தி வைத்துவிட்டது.
இந்த நிலையில் ‘வலிமை’ மற்றும் ‘ராதே ஷ்யாம்’ ஆகிய இரண்டு திரைப்படங்கள் மட்டுமே பொங்கல் தினத்தில் வெளியாகும் என்று தகவல் வெளியாகி உள்ளது. இதில் ‘ராதே ஷ்யாம்’ திரைப்படம் கூட ரிலீஸ் தேதி தள்ளிப்போக வாய்ப்பிருப்பதாக கூறப்படுகிறது.
இந்த நிலையில் தற்போது ஜனவரி 26 ஆம் தேதி ரிலீசாகும் என அறிவிக்கப்பட்டிருந்த விஷாலின் ’வீரமே வாகை சூடும்’ திரைப்படம் முன்கூட்டியே பொங்கல் தினத்தில் ரிலீஸ் செய்ய திட்டமிட்டுள்ளதாக கூறப்படுகிறது. இந்த படத்தின் படப்பிடிப்பு நேற்று முடிவடைந்த நிலையில் இந்த படத்தின் போஸ்ட் புரடொக்ஷன் பணிகள் கிட்டத்தட்ட முடிந்துவிட்டது என்பது குறிப்பிடத்தக்கது. எனவே வலிமையுடன் விஷாலின் வீரமே வாகை சூடும்’ மோதுமா? என்பது இன்னும் ஓரிரு நாளில் தெரிந்து விடும் என்பது குறிப்பிடத்தக்கது.
ஏற்கனவே அஜித்தின் ஆழ்வார் மற்றும் விஷாலின் தாமிரபரணி ஆகிய திரைப்படங்களும் அஜித்தின் ஆரம்பம் மற்றும் விஷாலின் பாண்டியநாடு ஆகிய திரைப்படங்களும் மோதியுள்ளன என்ற நிலையில் மீண்டும் ஒருமுறை அஜித், விஷால் திரைப்படங்கள் போதுமா? என்பதை பொறுத்திருந்து பார்ப்போம்.
