சினிமா செய்திகள்
‘பீஸ்ட்’ இரண்டாம் கட்ட படப்பிடிப்பு தொடங்கியது: விஜய், பூஜா ஹெக்டே கலந்து கொண்டனர்!
![beast second - Bhoomitoday](https://www.bhoomitoday.com/wp-content/uploads/2021/07/beast-second.jpg)
தளபதி விஜய் நடித்து வரும் ‘பீஸ்ட்’ படத்தின் முதல் கட்ட படப்பிடிப்பு கடந்த சில மாதங்களுக்கு முன்னர் ஜார்ஜியா நாட்டில் நடைபெற்றது என்பது தெரிந்ததே. இந்த நிலையில் இரண்டாம் கட்ட படப்பிடிப்பு மார்ச் மாதமே தொடங்கும் என்று எதிர்பார்க்கப்பட்ட நிலையில் திடீரென ஊரடங்கு உத்தரவு பிறப்பிக்கப்பட்டதால் தள்ளிவைக்கப்பட்டது. தற்போது சினிமா படப்பிடிப்புக்கு தமிழக அரசு அனுமதி வழங்கியதை அடுத்து ‘பீஸ்ட்’ படத்தின் அடுத்தகட்ட படப்பிடிப்பு ஜூலை முதல் வாரத்தில் தொடங்கும் என்று எதிர்பார்க்கப்பட்டது.
இந்த நிலையில் இன்று முதல் ‘பீஸ்ட்’ படத்தின் படபிடிப்பு தனியார் ஸ்டுடியோ ஒன்றில் தொடங்கியுள்ளதாகவும், இந்த படப்பிடிப்பில் விஜய் மற்றும் பூஜா ஹெக்டே கலந்து கொண்டதாகவும் கூறப்படுகிறது. முன்னதாக நேற்று ஹைதராபாத்தில் இருந்து சென்னைக்கு விமானம் மூலம் பூஜா ஹெக்டே வந்தார் என்பதும் சென்னை விமான நிலையத்தில் அவர் நடந்து வந்த வீடியோ சமூக வலைதளங்களில் வைரல் ஆனது என்பதும் குறிப்பிடத்தக்கது.
இந்த நிலையில் இன்று நடைபெறும் ‘பீஸ்ட்’ படத்தின் படப்பிடிப்பில் விஜய் மற்றும் பூஜா ஹெக்டே கலந்துகொள்ளும் பாடல் காட்சி படமாக்கப்பட உள்ளதாகவும் இந்த பாடல் காட்சி இன்னும் ஒரு சில நாட்களுக்கு படமாக்கப்படும் என்றும், அதன்பின் அதிரடி சண்டை காட்சிகள் படமாக்கப்பட உள்ளதாகவும் தகவல்கள் வெளிவந்துள்ளன.
விஜய், பூஜா ஹெக்டே, யோகி பாபு, விடிவி கணேஷ் உள்பட பலர் நடித்து வரும் இந்த படத்தை நெல்சன் இயக்கி வருகிறார். அனிருத் இசையில் உருவாகும் இந்த படத்தை சன் பிக்சர்ஸ் நிறுவனம் பிரம்மாண்டமாக தயாரித்து வருகிறது என்பது குறிப்பிடத்தக்கது.