வரலட்சுமியுடன்தான் திருமணமா? எப்போது?: விஷால் விளக்கம்!

நடிகை வரலட்சுமியும், நடிகர் விஷாலும் காதலித்து வருவதாகவும், இருவரும் திருமணம் செய்துகொள்ள இருப்பதாகவும் அடிக்கடி பேசப்படும். ஆனால் இருவருக்கும் திருமணம் முடிந்தபாடில்லை. இந்நிலையில் இது தொடர்பான கேள்வி ஒன்றுக்கு தற்போது நடிகர் விஷால் பதிலளித்துள்ளார்.

விஷால், கீர்த்தி சுரேஷ், வரலட்சுமி, ராஜ்கிரண் உள்ளிட்ட பலர் நடிப்பில் வெளியான சண்டக்கோழி 2 திரைப்படம் விமர்சன ரீதியாகவும், வசூல் ரீதியாகவும் நல்ல வரவேற்பை பெற்றது. விஷால் தயாரித்த இந்த படத்தின் சக்சஸ் மீட் ஆந்திராவில் நடைபெற்றது. தமிழை விட தெலுங்கில் தான் இந்த படம் அதிக வசூலை வசூலித்தது குறிப்பிடத்தக்கது.

இந்த சக்சஸ் மீட்டில் விஷாலிடம், வரலட்சுமியுடன்தான் திருமணமா? எப்போது? என கேள்வி கேட்கப்பட்டது. இதற்கு பதில் அளித்த விஷால், வரலட்சுமி எனது பால்ய நண்பர். என் மனதுக்கு நெருக்கமானவர். நேரம் வரும்போது எனது திருமணம் குறித்தும், யாரைத் திருமணம் செய்துகொள்ளப்போகிறேன் என்பது குறித்தும் தெளிவுபடுத்துவேன் என்றார்.

முன்னதாக நடிகை வரலட்சுமி அளித்த பேட்டி ஒன்றில், விஷால் எனக்கு நெருக்கமான நண்பர். எல்லா விஷயங்களையும் இருவரும் ஷேர் செய்துகொள்வோம். ஆனால் அவரும் நானும் காதலிப்பதாகவோ, டேட்டிங் செல்வதாகவோ வரும் தகவல்களில் உண்மையில்லை. விஷாலுக்கு, திருமணத்திற்குப் பெண் பார்த்தால், நானே பெண் பார்த்துத் திருமணம் செய்து வைக்கத் தயார். அவர் திருமணம் செய்துகொண்டால் மகிழ்ச்சியடையப் போவதும் நான்தான். எதற்காக விஷாலுடன் என்னை இணைத்துப் பேசுகிறார்கள் என்பதுதான் புரியவில்லை என்றார்.