தமிழ்நாடு
இன்று 12 மாவட்டங்களில் கொட்டப்போகுது கனமழை: எந்தெந்த மாவட்டங்கள்?
வெப்பச் சலனம் காரணமாக சென்னை உள்பட தமிழகம் முழுவதும் பல்வேறு இடங்களில் ஆங்காங்கே மழை பெய்து வரும் நிலையில் இன்று 12 மாவட்டங்களில் மழை பெய்யும் என்று சென்னை வானிலை ஆய்வு மையம் அறிவித்துள்ளது.
அசானி புயல் காரணமாக கடந்த சில நாட்களுக்கு முன்னர் தமிழகம் முழுவதும் நல்ல மழை பெய்தது என்பதை பார்த்தோம். இதனால் நீர்நிலைகளும் உயர்ந்தது என்பதும் குறிப்பாக மேட்டூர் அணையில் நீர்வரத்து அதிகரித்தது என்பதும் குறிப்பிடத்தக்கது.
இந்த நிலையில் தற்போது மீண்டும் அக்னி நட்சத்திர வெயில் கொளுத்தி வருவதால் 100 டிகிரிக்கு மேல் சென்னை உள்பட பல மாவட்டங்களில் வெப்பம் ஏற்பட்டு உள்ளது. இந்த நிலையில் இன்று வெப்பச்சலனம் காரணமாக 12 மாவட்டங்களில் கனமழை பெய்யும் என்று சென்னை வானிலை ஆய்வு மையம் தெரிவித்துள்ளது.
வேலூர், திருப்பத்தூர், ராணிப்பேட்டை, திருவண்ணாமலை, சேலம், தருமபுரி, கிருஷ்ணகிரி, காஞ்சிபுரம், நீலகிரி, கோவை, திருப்பூர் மற்றும் திண்டுக்கல் ஆகிய 12 மாவட்டங்களில் இன்று மழை பெய்யும் என்றும் சென்னை பொருத்தவரை ஓரிரு இடங்களில் வானம் மேகமூட்டத்துடன் காணப்படும் மழைக்கு வாய்ப்பு இல்லை என்றும் வானிலை ஆய்வு மையம் தெரிவித்துள்ளது.