சினிமா செய்திகள்
‘தி காஷ்மீர் ஃபைல்ஸ்’ ஒரு இழிவான சினிமா.. கோவா திரைப்பட விழாவில் சர்ச்சை!
‘தி காஷ்மீர் ஃபைல்ஸ்’ ஒரு இழிவான சினிமா என கோவா சர்வதேச திரைப்பட விழாவின் ஜூரி நாடவ் லெபிட் கூறியுள்ளது பெரும் சர்ச்சையை ஏற்படுத்தியுள்ளது.
தி காஷ்மீர் ஃபைல்ஸ் திரைப்படம், காஷ்மீரில் இருந்து இந்துக்கள் வெளியேறியது பற்றிய கதை கருவை கொண்டது. இந்த படத்தில் அனுபம் கெர், மிதுன் சக்கரவர்த்தி, தர்ஷன் குமார், பல்லவி ஜோஷி, சின்மயி மண்டலேகர், பிரகாஷ் பெலவாடி, புனித் இஸ்ஸார் மற்றும் பலர் நடித்து இருந்தனர்.
கோவாவில் 53வது சர்வதேச திரைப்பட விழா நடைபெற்று வரும் நிலையில், அதில் தி காஷ்மீர் ஃபைல்ஸ் திரைப்படம் திரையிடப்பட்டது.
இந்த திரைப்பட விழாவின் போது இன்று தி காஷ்மீர் ஃபைல்ஸ் படம் திரையிடப்பட்டுள்ளது. அதை பார்த்த சர்வதேச திரைப்பட விழாவின், தேர்வுக்குழு ஜூரி நாடவ் லெபிட், “தி காஷ்மீர் டைல்ஸ் ஒரு வெறுப்புணர்வைத் தூண்டும் வகையில் தயாரிக்கப்பட்ட இழிவான திரைப்படம்.
மிகவும் கெளரவமான இது போன்ற சர்வதேச திரைப்பட விழாவில் தி காஷ்மீர் ஃபைல்ஸ் திரையிடப்பட்டது மிகவும் அதிர்ச்சியாக உள்ளது. இந்த படத்தைப் பார்த்த எங்கள் அனைவருக்கும் மன உளைச்சலையும் தந்துள்ளது” என தெரிவித்துள்ளது பெரும் சர்ச்சையை ஏற்படுத்தியுள்ளது.
நாடவ் கருத்துக்கு பதிலடி கொடுத்துள்ள நடிகர் அனுபம் கெர், நாடவ் இப்படி சொல்லி இருப்பது வெட்கக்கேடானது. சித்தி விநாயகர் அவருக்கு அறிவை புகட்டட்டும். பொய் எவ்வளவு உயரமாக இருந்தாலும் உண்மையுடன் ஒப்பிடும் போது அது சிறியதே என தெரிவித்துள்ளார்.
தி காஷ்மீர் ஃபைல்ஸ் திரைப்படம், 2022-ம் ஆண்டு மார்ச் மாதம் திரையிடப்பட்ட போது பிரதமர் மோடி, அமித் ஷா உள்ளிட்டவர்கள் பெருமையாகப் பேசிய நிலையில், பல்வேறு தரப்பினர் இது ஒரு வெறுப்புணர்வைத் தூண்டும் படமாக உள்ளது என விமர்சித்ததும் குறிப்பிடத்தக்கது.