தமிழ்நாடு
திட்டுமிட்டுதான் திமுகவில் இணைந்தேன்: தினகரனை வறுத்தெடுக்கும் தங்க தமிழ்செல்வன்!
அமமுகவில் இருந்து விலகி திமுகவில் தன்னை இணைத்துக்கொண்ட தங்க தமிழ்செல்வன், தான் திட்டமிட்டு தான் திமுகவில் இணைந்ததாக தெரிவித்துள்ளார்.
சமீபத்தில் அமமுக பொதுச்செயலாளர் டிடிவி தினகரனுக்கும் அந்த கட்சியின் கொள்கைபரப்பு செயலாளராக இருந்த தங்க தமிழ்செல்வனுக்கும் இடையே ஏற்பட்ட மோதல் உச்சக்கட்டத்தை எட்டியதை அடுத்து அவர் அதிமுகவுக்கு செல்ல உள்ளதாக ஊடகங்களில் செய்தி வெளியானது. ஆனால் யாருமே எதிர்பார்க்காத வண்ணம் அவர் திமுக தலைவர் ஸ்டாலின் முன்னிலையில் அண்ணா அறிவாலயத்தில் வைத்து தன்னை திமுகவில் இணைத்துக்கொண்டார்.
அமமுகவில் இருந்து திமுகவுக்கு செல்லும் முன்னர் தங்க தமிழ்செல்வன், டிடிவி தினகரனை தடித்த வார்த்தைகளால் விமர்சனம் செய்தார். அமமுக என்ற கட்சியே உருவாகியிருக்கக் கூடாது என தற்போது தினகரனை மேலும் வறுத்தெடுக்கிறார். திமுகவில் இணைந்த பின்னர் தேனி சென்ற தங்க தமிழ்செல்வனுக்கு தேனி திமுக நிர்வாகிகள் வாழ்த்து தெரிவித்தனர்.
இதனையடுத்து நேற்று செய்தியாளர்களை சந்தித்த தங்க தமிழ்செல்வன், நீ எடுத்தது சரியான முடிவு. நீ இருக்க வேண்டிய இடம் திமுகதான், அதுதான் வளரக் கூடிய கட்சி என்று என்னிடம் ஆயிரத்திற்கு மேற்பட்ட பொதுமக்கள், வேறுகட்சியினர் கருத்து கூறினர். நான் எடுத்த முடிவு நல்ல முடிவுதான் என்று சொல்கிறார்களே தவிர யாரும் விமர்சனம் செய்யவில்லை. அமமுக என்ற ஒரு கட்சியே உருவாகியிருக்கக் கூடாது. சூழ்நிலை காரணமாக திமுகவில் இணையவில்லை. திட்டமிட்டுதான் இணைந்துள்ளேன் என்றார் அவர்.
