சினிமா செய்திகள்
தல தோர்.. தளபதி அயன்மேன் – மார்வெல் புரொமோ நிகழ்ச்சியில் நடிகைகள் கலகல!
மார்வெல் தயாரிப்பின் பிரம்மாண்டமான படமான கேப்டன் மார்வெல் வரும் மார்ச் 8ம் தேதி உலகம் முழுவதும் ரிலீசாகிறது.
தென்னிந்திய மொழிகளில் டப் செய்யப்பட்டு வெளியாகும் கேப்டன் மார்வெல் படத்தை நம்ம ஊர் நாயகிகளான சமந்தா, காஜல் அகர்வால், தமன்னா, ரகுல் ப்ரீத் சிங் கொண்டு புரொமோட் செய்தனர்.
நேற்று சென்னையில் நடைபெற்ற நிகழ்ச்சியில் பங்கேற்ற இந்த நடிகைகள், தமிழில் அயன்மேன் கதாபாத்திரத்திற்கு எந்த ஹீரோ பொருத்தமாக இருப்பார் என தொகுப்பாளினி ரம்யா கேட்க, ரகுல் ப்ரீத் சிங் சூர்யா என பதில் சொன்னார். ஆனால், காஜல் அகர்வால் மற்றும் சமந்தா தளபதி விஜய் தான் பொருத்தமாக இருப்பார். அவரது குறும்பு தனமும் சுறுசுறுப்பும் அயன்மேன் கதாபாத்திரத்திற்கு கச்சிதமாக இருக்கும் என கூற மற்ற நடிகைகளும் ஆமோதித்தனர்.
பின்னர், தோர் கதாபாத்திரத்திற்கு யார் என கேட்க, தல அஜித் என்று தமன்னா சொன்னார்.
கேப்டன் அமெரிக்கா கதாபாத்திரத்திற்கு சூர்யா பொருத்தமாக இருப்பார் என சமந்தாவும் காஜலும் கூறினர்.
ஹல்க் கதாபாத்திரத்திற்கு ஆர்யா அல்லது விஷால் நடிக்கலாம் என நாயகிகள் நக்கலாக சிரித்துக் கொண்டே பதில் அளித்தனர்.
உங்களில் யாருக்காவது ஒருநாள் திடீரென கேப்டன் மார்வெல் சக்தி கிடைத்தால் என்ன செய்வீங்க என கேட்க, அதற்கு விடையளித்த ரகுல் ப்ரீத் சிங், தீவிரவாதிகளையே இல்லாமல் காலி பண்ணிடுவேன். எனக் கூறினார். அவரது பதிலை மற்ற மூன்று நடிகைகளும் ஆமோதித்து, புல்வாமா தாக்குதல் குறித்தும் பேசத் தொடங்கினர்.
பின்னர் கேப்டன் மார்வெலை கண்டிப்பாக தியேட்டரில் போய் பாருங்கள் எனக் நாயகிகள் வந்த வேலையை செய்தனர்.
