தமிழ்நாடு
கமல்ஹாசனுக்கு தமிழிசை அறிவுரை!
![Kamal and Tamilisai - Bhoomitoday](https://www.bhoomitoday.com/wp-content/uploads/2018/10/Kamal-and-Tamilisai.jpg)
மக்கள் நீதி மைய்யம் கட்சியின் தலைவர் நடிகர் கமல் கல்லூரி மாணவர்கள் மத்தியில் அரசியல் செய்வதாக கண்டனம் தெரிவித்துள்ள தமிழக பாஜக தலைவர் தமிழிசை சௌந்தரராஜன் அவருக்கு அறிவுரை வழங்கியுள்ளார்.
நடிகர் கமல்ஹாசன் மக்கள் நீதி மைய்யம் என்ற கட்சியை ஆரம்பித்து அதனை பலப்படுத்தும் முயற்சியில் ஈடுபட்டு வருகிறார். இதற்காக கல்லூரிகளில் மாணவர்கள் மத்தியில் தொடர்ந்து பேசி வருகிறார் அவர். இந்நிலையில் நடிகர் கமல் தொலைக்காட்சி ஒன்றில் பேசிய போது கூட்டணி குறித்து பேசியுள்ளார்.
அதில், திமுகவுடன் கூட்டணி கிடையாது எனவும், காங்கிரஸ் கட்சியுடன் கூட்டணி அமைப்பதை மறுப்பதற்கில்லை எனவும் ஆனால் அதற்கான தேவை தற்போது இல்லை என தெரிவித்தார். இந்நிலையில் இதுகுறித்து பாஜக தலைவர் தமிழிசை சௌந்தரராஜன் நேற்று செய்தியாளர் சந்திப்பில் பதிலளித்துள்ளார்.
அப்போது, திமுகவுடன் காங்கிரஸ் இருந்தாலும், கமல்ஹாசனுடன் காங்கிரஸ் இருந்தாலும் ஒன்றும் சாதிக்கப் போவதில்லை. கமல்ஹாசன் சேர்வதால் காங்கிரஸின் தோல்வி இன்னும் உறுதி செய்யப்படுகிறது. காங்கிரஸ் உடன் யார் இருந்தாலும் அவர்கள் தோல்வியடையப் போகிறார்கள்.
அவர் கல்லூரி மாணவர்களை படிக்க விடவேண்டும். உங்களின் அரசியல் களத்தை மேம்படுத்த வேண்டும் என்பதற்காக கல்லூரிகளுக்கு சென்று மாணவர்களிடம் அரசியல் செய்யாதீர்கள் என்று தமிழிசை கமல்ஹாசனை அறிவுறுத்தியுள்ளார்.