தமிழ்நாடு
தமிழ்நாடு நாள் தேதி மாற்றம்: திமுக அரசு அதிரடி அறிவிப்பு!
![TAMIL NADU DAY - Bhoomitoday](https://www.bhoomitoday.com/wp-content/uploads/2021/10/TAMIL-NADU-DAY.jpg)
கடந்த அதிமுக ஆட்சியில் நவம்பர் 1ஆம் தேதி தமிழ்நாடு நாளாக கொண்டாடப்பட்டு வந்த நிலையில் தற்போது தமிழ்நாடு நாள் தேதி மாற்றப்பட்டதாக திமுக அரசு அறிவித்துள்ளது.
மொழிவாரி மாநிலங்கள் பிரிக்கப்பட்ட நவம்பர் 1ஆம் தேதியை தமிழ்நாடு மாநில நாளாக முந்தைய அதிமுக அரசு அறிவித்து இருந்தது என்பது குறிப்பிடத்தக்கது. அது முதல் நவம்பர் 1ஆம் தேதியை தமிழ்நாடு நாளாக கொண்டாடப்பட்டு வந்தது.
இந்த நிலையில் பல்வேறு அரசியல் கட்சிகள் மற்றும் அரசியல் அமைப்புகள் கோரிக்கை விடுத்ததை கவனமாக பரிசீலித்து இனிமேல் ஜூலை 18ஆம் தேதி தான் தமிழ்நாடு நாள் என முடிவு செய்யப்பட்டுள்ளதாக சற்று முன்னர் தமிழக முதலமைச்சர் முக ஸ்டாலின் அவர்கள் தெரிவித்துள்ளார்.
தமிழ்நாடு என அறிஞர் அண்ணா பெயர் சூட்டிய ஜூலை 18-ஆம் தேதி இனி தமிழ்நாடு நாளாக கொண்டாடப்படும் என்றும் இது குறித்த அரசாணை விரைவில் வெளியிடப்படும் என்றும் தமிழக முதலமைச்சர் முக ஸ்டாலின் அவர்கள் குறிப்பிட்டுள்ளார்.
தமிழகம் ஆங்கிலத்தில் மெட்ராஸ் ஸ்டேட் என்றும், தமிழில் சென்னை மாகாணம் என்றும் அழைக்கப்பெற்ற நிலையில் ‘தமிழ்நாடு’ என்று மாற்றக்கோரி போராட்டங்கள் நடைபெற்றன என்பதும், இதற்காக, சங்கரலிங்கனார் என்பவர் 76 நாட்கள் உண்ணாவிரதம் இருந்து உயிர் துறந்தார் என்பதும் குறிப்பிடத்தக்கது. அதன்பின்னரே மதராசு ஸ்டேட் என்று இருந்த பெயர் 1969 ஆம் ஆண்டு ஜுலை 18ஆம் தேதி தமிழ்நாடு என்று அன்றைய முதல்வராக இருந்த அறிஞர் அண்ணா அவர்களால் மாற்றப்பட்டது. இதனையடுத்தே தற்போது ஜூலை 18ஆம் தேதியை தமிழ்நாடு நாள் என அறிவிக்கப்பட்டுள்ளது.