சினிமா செய்திகள்
தமிழ்நாடு திரைப்பட தயாரிப்பாளர் சங்கம் தொடங்கிய டி.ராஜேந்தர்!
டி.ராஜேந்தர் தமிழ்நாடு திரைப்பட தயாரிப்பாளர் சங்கம் ஒன்றை தனது தலைமையில் தொடங்கியுள்ளார்.
அண்மையில் நடந்த தமிழ் திரைப்பட தயாரிப்பாளர் சங்கத் தேர்தலில் போட்டியிட்ட டி.ராஜேந்தர் 200-க்கும் அதிகமான வாக்கு வித்தியாசத்தில் தோற்றுப்போனார். இதை அடுத்து தயாரிப்பாளர் சங்கத் தேர்தலில் மோசடி நடந்தது என்று எல்லாம் பத்திரிக்கையாளர்களுக்குப் பேட்டியளித்தார்.
இன்று தமிழ் திரைப்பட தயாரிப்பாளர்கள் சங்கத்தில் வெற்றி பெற்ற தேணாண்டால் பிலிம்ஸ் முரளி பதவி ஏற்றுக்கொண்டார். பதவியேற்பு விழாவில் அமைச்சர் கடம்பூர் ராஜூ பங்கேற்றார்.
அதே நேரத்தில் டி.ராஜேந்தர் தலைமையில் தமிழ்நாடு திரைப்பட தயாரிப்பாளர் சங்கம் என்று ஒன்று உருவாகியுள்ளது. ஏற்கனவே நடப்புத் தயாரிப்பாளர் சங்கம் என்று ஒன்று பிரிந்துள்ள நிலையில், புதிதாக ஒரு சங்கம் உருவாகியுள்ளது.
இன்று நடைபெற்ற இந்த இரண்டு முக்கிய நிகழ்வில் கவனிக்க வேண்டியது என்னவெனில், தமிழ் திரைப்பட தயாரிப்பாளர் சங்கம் பதவியேற்பு விழா பேனரில் தமிழ்நாடு திரைப்பட தயாரிப்பாளர் சங்கம் என்று பெயரிடப்பட்டு இருந்ததுதான்.
சங்கத்தின் பெயரே தெரியாமல் இப்படி பேனர் வைத்த இவர்கள், எப்படி தயாரிப்பாளர் சங்கத்தைச் சரியாக நிர்வகிப்பார்கள் என்று கோலிவுட் வட்டாரத்தில் சலசலப்பும் ஏற்பட்டுள்ளது.
சிம்பு இந்த சங்கத்திற்காகத்தான் புதியதாக ஒரு படத்தை இலவசமாக நடித்துக்கொடுப்பார் என்ற தகவல்களும் வெளியாகியுள்ளன.
