சினிமா செய்திகள்
வடிவேலுவுக்கு இயக்குநர் சுசீந்திரன் பகிரங்க கண்டனம்!
இயக்குநர் சுசீந்திரன் நடிகர் வடிவேலுவுக்கு தனது வன்மையான கண்டனத்தை ட்விட்டர் பக்கத்தில் பகிரங்கமாக தெரிவித்துள்ளார்.
Save For Nesamani ஹேஷ்டேக் உலகளவில் டிரெண்டானதால், நடிகர் வடிவேலு இந்த வாய்ப்பை சரியாக பயன்படுத்திக் கொள்ள எண்ணியுள்ளார். இந்நிலையில், வடிவேலு அளித்த ஒரு பேட்டியில் இயக்குநர் சிம்புதேவன் குறித்து அவமரியாதையாக பேசியதற்கு இயக்குநர் சுசீந்திரன் பகிரங்கமாக தனது வன்மையான கண்டனத்தை தெரிவித்துள்ளார்.
இது குறித்து அவர் எழுதியுள்ள கடிதத்தில், வடிவேலு அவர்கள், 23-ஆம் புலிகேசி இயக்குநர் சிம்புதேவன் மற்றும் அந்த படத்தின் தயாரிப்பாளர் ஷங்கர் சார் பற்றி இவன், அவன் என்று மரியாதை இல்லாமல் பேசியதற்கு ஒரு இயக்குநராக எனது கண்டனத்தை தெரிவிக்கிறேன் என்றுள்ளார்.
மேலும், 23-ஆம் புலிகேசி படத்திற்கு பிறகு வடிவேலுவின் தலையீட்டால் அவர் நடித்த இந்திரலோகத்தில் நா. அழகப்பன், எலி, தெனாலிராமன் படுதோல்வியை சந்தித்ததை மறக்க வேண்டாம் என்றும் அந்த கடிதத்தில் பதிவிட்டுள்ளார்.
