சினிமா செய்திகள்
ராஜ்யசபா எம்.பி பதவி வாய்ப்பை ஏற்க மறுத்த நடிகர் சோனு சூட்?
பாலிவுட் நடிகர் சோனு சூட்-க்கு ராஜ்யசபா எம்.பி பதவி கிடைக்க இருந்ததாகவும் அந்த வாய்ப்பை அவர் மறுத்துவிட்டதாகவும் செய்திகள் வெளியாகி உள்ளன.
நடிகர் சோனு சூட் பாலிவுட் மட்டுமல்லாது டோலிவுட், கோலிவுட் எனப் பல மொழிகளிலும் நடித்து வருகிறார். கொரோனா வைரஸ் பரவல் ஏற்பட்ட ஆரம்ப காலகட்டத்தில் பல வேற்று மாநில தொழிலாளர்களுக்கும் சொந்த ஊருக்குச் செல்வதற்கான வசதி முதல் நிதி உதவி, தொழில் உதவி, மருத்துவ உதவி, கல்வி உதவி, விவசாய உதவி, வெளிநாட்டு இந்திய மாணவர்களுக்குத் தேவையான உதவிகள், பிரபலங்கள் முதல் ஏழைகள் வரை அனைவருக்கும் தேவைப்பட்ட கொரோனா கால மருத்துவ உதவிகள் என மனிதநேயத்தின் இமயமாகத் திகழ்பவர் சோனு சூட்.
இவரது மனிதநேய உதவிகளுக்காக சொந்தமாகக் கடன் வாங்கி, தனது சொத்துகளை எல்லாம் அடமானம் வைத்து எனப் பல சவால்களையும் சந்தித்தார். இந்தியாவில் பல மாநில மக்களும் தொடர்ந்து சோனு சூட்-க்கு நன்றிகளைத் தெரிவித்து வருகின்றனர். இடையில் சோனு சூட் தான் இந்தியாவின் பிரதமர் ஆக இருக்க வேண்டும் என்றெல்லாம் ரசிகர்கள் குரல் எழுப்பத் தொடங்கினர்.
இதைப் பார்த்த மாநில அரசு ஒன்று சோனு சூட்-க்கு ராஜ்யசபா எம்.பி பதவி தர முன் வந்ததாகவு அதை ஏற்க விரும்பவில்லை என அவர் தெரிவித்துவிட்டதாகவும் சோனுவுக்கு நெருங்கிய வட்டாரத்தினர் தெரிவித்துள்ளனர். எந்த உள்நோக்கமும் இல்லாது செய்த உதவிக்குப் பதவி வேண்டாம் என சோனு சூட் தெரிவித்துவிட்டாராம்.