சினிமா
பிரபல நடன இயக்குனர் சிவசங்கர் மறைவு – திரையுலகினர் இரங்கல்
தமிழ் மட்டுமின்றி தெலுங்கு கன்னடம் இந்தி என பத்துக்கும் மேற்பட்ட மொழிகளில் சுமார் 800க்கும் மேற்பட்ட படங்களுக்கு நடனம் அமைத்தவர் சிவசங்கர் மாஸ்டர். குறிப்பாக தனுஷ் ஆடிய ‘மன்மத ராசா’ பாடலுக்கு இவர்தான் நடனம் அமைத்தார்.
அஜித்தின் வரலாறு, எஸ்எஸ் ராஜமவுலியின் மகதீரா, பாகுபலி, மற்றும் அருந்ததி உள்பட பல படங்களுக்கு நடனம் அமைத்தவர் இவர் கடந்த சில நாட்களுக்கு முன் கொரோனாவால் பாதிக்கப்பட்டு தனியார் மருத்துவமனையில் அனுமதிக்கப்பட்டார். அவரின் உடல்நிலை ஆபத்தான நிலையில் இருப்பதாகவும் மருத்துவர்கள் தெரிவித்துள்ளனர். அவரின் நுரையீரல் அதிகம் பாதிக்கப்பட்டிருப்பதாக அவரின் மகன் தெரிவித்தார்.
எனவே, அவரின் சிகிச்சைக்கு உதவ வேண்டும் என அவரது குடும்பத்தினர் கோரிக்கை விடுத்ததாகவும் செய்திகள் வெளியானது. குறிப்பாக சிவசங்கர் பாபாவின் மகன் அஜய் கிருஷ்ணா அவர்கள் பல திரையுலக பிரபலங்களிடம் உதவி கேட்டார். இதையடுத்து, சிவசங்கரின் சிகிச்சைக்கு நிதி உதவி அளிக்க பிரபல பாலிவுட் நடிகர் சோனுசூட் உறுதி அளித்தார். மேலும், தனுஷும் உதவ முன் வந்தார்.
இந்நிலையில், சிகிச்சை பலனின்றி அவர் நேற்று இரவு மரணமடைந்தார். அவரின் மறைவுக்கு திரையுலகினர் மற்றும் ரசிகர்கள் இரங்கல் தெரிவித்து வருகின்றனர்.