டீ சர்ட்டில் அழகிரி; ஆனால் செல்ஃபி ஸ்டாலினுடன்: வைரலாகும் புகைப்படம்!

திமுக தலைவர் மு.க.ஸ்டாலினுடன் மு.க.அழகிரி படம் போட்ட டீ சர்ட் அணிந்த நபர் ஒருவர் செல்ஃபி எடுத்துக்கொண்ட புகைப்படம் சமூக வலைதளங்களில் வைரலாக பரவி வருகிறது.

திமுக தலைவர் கலைஞர் இருந்தபோது மு.க.ஸ்டாலினுக்கு எதிராக பேசிய மு.க.அழகிரி திமுகவில் இருந்து நீக்கப்பட்டார். ஆனாலும் தொடர்ந்து மு.க.ஸ்டாலினுக்கு எதிராகவே பேசி வருகிறார் அழகிரி. கலைஞர் கருணாநிதியின் மறைவுக்கு பின்னர் திமுகவில் இணைய அழகிரி பல முயற்சி மேற்கொண்டார். ஆனால் ஸ்டாலின் அவரை கடைசி வரை கட்சியில் சேர்த்துக்கொள்ளவே இல்லை.

இந்நிலையில் தேர்தல் பிரச்சாரத்துக்காக மதுரை வந்த திமுக தலைவர் மு.க.ஸ்டாலின் இன்று காலை மதுரை மாட்டுத்தாவணி காய்கரி சந்தை பகுதியில் நடைபயிற்சி மேற்கொண்டார். அப்போது நடைபயிற்சியில் ஈடுபட்ட பொதுமக்கள், வியாபாரிகளிடம் தீவிர வாக்கு சேகரிப்பில் ஈடுபட்டார். அப்போது அவருடன் பலரும் செல்ஃபி எடுத்துக்கொண்டனர்.

அப்போது மஞ்சள் நிறத்தில் ஸ்டாலின் டீ சர்ட் அணிந்திருந்தார். அதே போல மஞ்சள் நிற டீ சர்ட்டில் அழகிரி படம் போட்ட ஒருவர் ஸ்டாலினுடன் செல்ஃபி எடுத்துக்கொண்டார். இந்த புகைப்படம் தற்போது சமூக வலைதளங்களில் வைரலாக பரவி வருகிறது. அழகிரி, ஸ்டாலின் இடையே மோதல் இருக்கும் சூழலில் அழகிரியின் புகைப்படம் உள்ள டீ சர்ட்டுடன் ஒருவர் ஸ்டாலினிடம் செல்ஃபி எடுத்தது பரபரப்பாக பேசப்படுகிறது.