இளையதலைமுறையினர் ஒவ்வொருவரும் அஜித்தை பின்பற்ற வேண்டும்: சீமான் வாழ்த்து

இளைய தலைமுறையினர் ஒவ்வொருவரும் அஜித்தை பின்பற்ற வேண்டும் என நாம் தமிழர் கட்சியின் ஒருங்கிணைப்பாளர் சீமான் அஜீத்துக்கு வாழ்த்து தெரிவித்துள்ளார்.

சமீபத்தில் தமிழக அளவில் நடைபெற்ற 46வது துப்பாக்கி சுடும் போட்டியில் அஜித்துக்கு 4 தங்கப் பதக்கமும் இரண்டு வெள்ளிப் பதக்கங்கள் கிடைத்தது என்பது குறிப்பிடத்தக்கது. இதனை அடுத்து அஜித்துக்கு துணை முதல்வர் ஓ பன்னீர்செல்வம் உள்பட பல பிரபலங்கள் வாழ்த்து தெரிவித்து வரும் நிலையில் நாம் தமிழர் கட்சியின் ஒருங்கிணைப்பாளர் சீமான் தனது டுவிட்டர் பக்கத்தில் அஜீத்துக்கு வாழ்த்து தெரிவித்த அவர் கூறியிருப்பதாவது:

சென்னையில் நடைபெற்ற 46-வது தமிழ்நாடு மாநிலத் துப்பாக்கி சுடுதல் முதல்நிலைப் போட்டியில் ‘சென்னை ரைஃபிள் கிளப்’ அணிக்காக தம்பி அஜித்குமார் அவர்கள் பங்கேற்று 6 பதக்கங்களை வென்ற செய்தியறிந்து பெருமகிழ்ச்சி அடைந்தேன்.

தம்பி அஜீத் திரைப்பட நடிகராக மட்டுமின்றி, துப்பாக்கி சுடுதல், இரண்டு, நான்கு சக்கர வாகனப் பந்தயங்களில் பங்கெடுத்தல், நவீன எந்திரப் பொறிகளை உருவாக்குதல் உள்ளிட்டப் பன்முகத்திறமைகளைக் கொண்டவராக விளங்குவது பாராட்டுக்குரியது.

இன்றைய இளைய தலைமுறையினர் ஒவ்வொருவரும் தனது தனித்திறனை வளர்த்துக்கொள்ள வேண்டும் என்பதற்கேற்பத் திகழும் தம்பி அஜீத் அவர்கள் தொடர்ந்து மேலும் பல சாதனைகளைப் புரிய எனது நெஞ்சம் நிறைந்த வாழ்த்துகளைத் தெரிவிக்கிறேன்!

சீமானின் இந்த வாழ்த்துக்கு அஜித் ரசிகர்கள் நன்றி தெரிவித்து வருகின்றனர்.