தமிழ்நாடு
தலைவர் மீண்டும் கட்சி தொடங்குகிறார்: ரஜினி மன்ற முக்கிய நிர்வாகியின் அறிக்கை!
சூப்பர் ஸ்டார் ரஜினிகாந்த் அவர்கள் அரசியல் கட்சி தொடங்கி வரும் தேர்தலில் போட்டியிடுவார் என்று எதிர்பார்க்கப்பட்ட நிலையில் திடீரென தனது உடல்நிலை காரணமாக அரசியல் கட்சி தொடங்க வில்லை என அறிவித்தார்.
இந்த அறிவிப்பு ரஜினி ரசிகர்களுக்கு பேரதிர்ச்சியாக இருந்த நிலையில் ஒரு சில ரஜினி மன்ற நிர்வாகிகள் வெவ்வேறு கட்சிகளுக்கு தாவினார்கள். இந்த நிலையில் ரஜினியின் பெயரில் ஒரு கட்சியை ஆரம்பிக்க இருப்பதாக அவரது ரசிகர் மன்ற நிர்வாகி ஒருவர் முடிவு செய்தபோது அவரை தொடர்பு கொண்ட ரஜினி தரப்பினர், ரஜினிகாந்த் விரைவில் அரசியல் கட்சி ஆரம்பிக்க இருப்பதாகவும், எனவே உங்கள் முடிவை நிறுத்துங்கள் என்று கூறியதாக தகவல்கள் வெளிவந்துள்ளது. இதனை அடுத்து அந்த ரசிகர் வெளியிட்டுள்ள அறிக்கை ஒன்றில் கூறியிருப்பதாவது:
திரு ரஜினிகாந்த் மீண்டும் அரசியலுக்கு வருவதாக அறிவிப்பார், அதிரடியாக கட்சித் தொடங்கி தமிழக முதல்வராகவும் அமர்வார் என ரஜினி மக்கள் மன்ற மாவட்ட துணை செயலாளர் ஆர்எஸ்ராஜன் தெரிவித்துள்ளார். இதுகுறித்து, குமரி மாவட்ட ரஜினி மக்கள் மன்ற மாவட்ட துணை செயலாளர் ஆர்எஸ்.ராஜன் விடுத்துள்ள அறிக்கையில் கூறியிருப்பதாவது:
ரஜினிகாந்தின் ஆரம்ப காலக்கட்டம் முதல் அவரது தீவிர ரசிகனாக நானும் கோடிக்கணக்கான ரசிகக் கண்மணிகளும் இருக்கிறோம். ஆனால் நாங்கள் யாரும் அவர் முதல்வராக வேண்டும் என்றோ கட்சி தொடங்குவார் நாமும் எம்.எல்.ஏ எம்பியாகிவிடலாம் என்றோ அவருக்கு ரசிகர் ஆனவர்கள் கிடையாது. அவரை சகோதரனாக இன்னும் சொல்லப் போனால் கலைத்தாயின் தலைமகனை எங்கள் விட்டின் மூத்த அண்ணனாகவே அவரது ரசிகர்கள் பார்த்துவருகிறோம். அதனால் தான் எப்போதும் அவரை பின் தொடரும் நிழலாகச் செல்கிறோம்.
அதனால் தான் இங்கே சிஸ்டம் சரியில்லை என்றார் தலைவர் ரஜினிகாந்த் மாற்றம் வேண்டும் என்னும் நம்பிக்கையில் தான் அவர் பின்னால் திரண்டோம். 2017ஆம் ஆண்டு தலைவர் ரஜினிகாந்த் அரசியலுக்கு வருகிறேன் எனச் சொன்னபோது நான் உள்பட ரசிகர்கள் பலரும் பெருமகிழ்ச்சி அடைந்தோம். மேலும் நான் அப்போது காங்கிரஸ் கட்சியின் விவசாய அணியின் மாநில செயலாளர் பொறுப்பையும் ராஜினாமா செய்து விட்டு தலைவர் ரஜினிகாந்த் வழியில் தொடர்ந்து பயணித்து வருகிறேன் கடந்த டிசம்பர் மாத இறுதியில் தலைவர் கட்சி தொடங்கும் முடிவை கைவிட்டது ரசிகர்கள் மத்தியில் பெரிய அதிர்ச்சியை ஏற்படுத்தியது. ரஜினியை விட்டால் தமிழகத்தை மீட்க யாரும் இல்லை என தமிழக மக்களே பேசத் துவங்கிய நேரத்தில்தான் தலைவர் இந்த முடிவை எடுத்திருந்தார்.
ஆனால் இப்போது தலைமையில் இருந்தே நேரடியாக என்னைத் தொடர்புகொண்டு பேசினார்கள். தலைவர் மீண்டும் கட்சி தொடங்குவது குறித்து ஆலோசனையில் இருப்பதாகவும் விரைவில் நல்ல முடிவு எடுப்பார் எனவும் கூறியிருக்கிறார். தலைவர் ரஜினிகாந்த் அரசியலுக்கு வருவதாக சொல்லும் நாள் தான் உண்மையில் தமிழக மக்களின் திருநாள். அந்த நாளுக்காக காத்திருக்கிறேன். அதனால் புதிய கட்சித் தொடங்கும் பணியைத் தற்காலிகமாக நிறுத்தி வைத்துவிட்டு தலைவர் ரஜினிகாந்தின் வருகைக்காக காத்திருக்கிறேன். தலைவர் ரஜினிகாந்த் விரைவில் அரசியலுக்கு வருவதாக அறிவிப்பார். அந்த அறிவிப்பு தமிழ் மக்களுக்கு பெருமகிழ்ச்சியைத் தரும்.
அவருக்காக உழைப்பதையும் அவர் அரியணையில் அமர்ந்து தமிழர் நலன் சார்ந்த திட்டங்களை நிறைவேற்றுவதையும் கண் குளிர பார்க்க வேண்டும் என்பதே ஒவ்வொரு ரசிகனின். ஏன் தமிழக மக்களின் எதிர்பார்ப்பாக இருக்கிறது என அதில் கூறப்பட்டுள்ளது.