தமிழ்நாடு
ரஜினியை இயக்குவது பாஜகவா? ரஜினியின் சகோதரர் பரபரப்பு பேட்டி!
பிரபல நடிகர் ரஜினிகாந்த் தமிழகத்தில் சட்டசபை தேர்தல் எப்போது வந்தாலும் அதனை சந்திக்க தயாராக இருப்பதாக சமீபத்தில் செய்தியாளர்கள் சந்திப்பில் தெரிவித்தார். இந்நிலையில் அவரது சகோதரர் சத்யநாராயணா ரஜினியின் அரசியல் குறித்து பரபரப்பு பேட்டி ஒன்றை அளித்துள்ளார்.
சிவகங்கையை அடுத்த பிள்ளையார்பட்டியில் உள்ள கோவிலில் சாமி தரிசனம் செய்ய வந்த நடிகர் ரஜினியின் சகோதரர் சத்யநாராயணா பின்னர் செய்தியாளர்களை சந்தித்தார். அப்போது, சட்டமன்றத் தேர்தல்தான் ரஜினியின் இலக்கு. பாஜக ரஜினியை இயக்குவது என்று கூறுவது உண்மையில்லை என தெரிவித்தார்.
தொடர்ந்து பேசிய ரஜினியின் சகோதரர், வருகிற சட்டமன்றத் தேர்தலில் 234 தொகுதிகளிலும் ரஜினி தனித்தே நிற்பார். இந்த தேர்தல் அவருக்கு ஒரு அனுபவமாக இருக்கிறது. யார் யார் நிற்கிறார்கள். என்ன பேசுகிறார்கள். எங்கு போகிறார்கள் என்று கவனித்து வருகிறார். தேர்தல் முடிவுகள் வரட்டும். ஏற்கனவே சொல்லியிருக்கிறார் சட்டமன்றத் தேர்தல்தான் இலக்கு என்று. நிச்சயமாக வருவார் என்றார்.