‘அந்தகன்’ ஷூட்டிங் ஸ்பாட்டில் பிறந்தநாள் கொண்டாடிய பிரசாந்த்

இந்தியின் பிரபல முன்னணி நடிகர்கள் ஆயுஷ்மான் குரானா – தபு நடிப்பில் வெளியாகி மெகா ஹிட் அடித்த திரைப்படம் அந்தாதூன். இந்தப் படத்தின் தமிழ் ரீமேக்கில் ‘டாப் ஸ்டார்’ பிரசாந்த் நடிக்கிறார். தபு நடித்த வில்லி கதாப்பாத்திரத்தில் சிம்ரன் நடிக்கிறார். பிரசாந்தின் தந்தையான தியாகராஜன், இப்படத்தைத் தயாரிக்கிறார். சந்தோஷ் நாராயணன் இதற்கு இசையமைக்கிறார். 

இந்தப் படத்தின் தமிழ் பெயர் ‘அந்தகன்’. இந்நிலையில் இந்தப் படத்திற்கான ஷூட்டிங் சில வாரங்களுக்கு முன்னர் பூஜையுடன் ஆரம்பித்தது. இப்படியான சூழலில் நடிகர் பிரசாந்த், நேற்றுத் தனது 48வது பிறந்த நாளை கொண்டாடினார். அவருக்கு அந்தகன் படக்குழுவினர் ஷூட்டிங் ஸ்பாட்டிலேயே கேக் வெட்டி அமர்க்களப்படுத்தி உள்ளனர்.

ரசிகர்கள் மத்தியில் பெரும் எதிர்பார்ப்பை ஏற்படுத்தியிருக்கும் இந்தப் படத்தின் ஃபர்ஸ்ட் லுக் போஸ்டர் சில மாதங்களுக்கு முன்னர் வெளியிடப்பட்டது. அந்தாதூன் படத்தில், ஆயுஷ்மான் குரானா ஒரு பியானிஸ்டாக இருப்பார். அதன் காரணமாக அந்தப் படத்தில் வரும் இசை, மிகச் சிறப்பானதாக இருக்கும். அதன் இன்ஸ்பிரேஷனில் இப்படம் எடுக்கப்படுவதால் எப்படியும் இந்தப் படத்திலும் இசை முக்கிய அங்கம் வகிக்கும் என்று எதிர்பார்க்கப்படுகிறது. சந்தோஷ் நாராயணன் இதற்கு இசை என்பதால் அதன் எதிர்பார்ப்பு மேலும் அதிகரித்துள்ளது.