உலகம்
துபாயில் பிசினஸ் செய்யும் இந்தியர்களின் கவனத்திற்கு.. புதிய வரி விதிகள் அமல்..!
ஐக்கிய அரபு எமிரேட்ஸ் நாட்டில் புதிய வரிகள் விதிக்கப்பட்டுள்ளதாகவும் இந்த வரிகள் வரும் ஜூன் ஒன்றாம் தேதி முதல் அமலுக்கு வரும் என்றும் அறிவிக்கப்பட்டுள்ளது. இதனை அடுத்து துபாய்க்கு சென்று வேலை பார்க்கும் இந்தியர்கள் அந்நாட்டின் இந்த புதிய வரி விதிப்பு குறித்து தெரிந்து கொள்ள வேண்டியது அவசியமாகிறது. இந்த புதிய வரி விதிப்பு குறித்து தற்போது விளக்கமாக பார்ப்போம்.
சம்பளம் பெறுபவர்கள் இந்த புதிய வரிவிதிப்பின் கீழ் வரமாட்டார்கள் என்றும்,
புதிய வரிவிதிப்பு விதிகள் வணிக வருமானம் உள்ள நபர்களுக்கு மட்டுமே பொருந்தும் என்றும் அறிவிக்கப்பட்டுள்ளது. ஐக்கிய அரபு எமிரேட்ஸில் சம்பள வருமானம் பெறும் நபர்கள் புதிய வரிவிதிப்பு விதிகளின் கீழ் வரமாட்டார்கள் என்பதால் நீங்கள் துபாய்/யுஏஇயில் வேலை செய்து கொண்டிருந்தாலோ அல்லது வேலைக்குச் செல்லத் திட்டமிட்டிருந்தாலோ, புதிய வரி விதிப்பு விதிகள் உங்களைப் பாதிக்காது.
ஆனால் துபாயில் பிசினஸ் செய்பவர்கள் AED 375,000க்கும் அதிகமாக வருமானம் இருந்தால் வரி செலுத்த வேண்டும். புதிய சட்டத்தின் கீழ் AED 375,000 அதாவது இந்திய மதிப்பில் சுமார் ரூ. 84 லட்சம் வரை வரிவிலக்கு வழங்கப்பட்டுள்ளது. ஒருசில வணிகங்களுக்கு வரிவிலக்கு உள்ளது என்பதால் துபாய், ஐக்கிய அரபு எமிரேட் நாடுகளில் வணிகம் செய்ய திட்டமிடும் இந்தியர்கள், வணிக வரியிலிருந்து விலக்கு நிலையைப் புரிந்துகொண்டு அவற்றை பின்பற்ற வேண்டும்.
புதிய வதி விரிப்பு 2023ஆம் ஆண்டு ஜூன் 1 அமலுக்கு வருகிறது. ஜூன் 1ஆம் தேதிக்கு பின் துபாயில் தொழில் செய்யும் இந்தியர்களின் வருமானம் AED 375,000க்கும் மேல் இருந்தால் அந்த வருமானத்திற்கு 9% கார்ப்பரேட் வரி செலுத்த வேண்டும். ஐக்கிய அரபு எமிரேட்ஸில் வசிப்பவர்கள், வணிக நடவடிக்கைகளில் ஈடுபடுபவர்கள் மட்டுமே புதிய வரிவிதிப்பு விதிகளின் கீழ் வருவார்கள் என்பது குறிப்பிடத்தக்கது.
ஐக்கிய அரபு அமீரகத்தின் புதிய வரி விதிப்பின்படி சிறு தொழில்களுக்கு ஆதரவு அளிக்கும் வகையில் AED 375,000 வரையிலான லாபத்திற்கு வரி இல்லை என வரித்துறை அமைச்சகம் உறுதி செய்துள்ளது. மேலும் வணிகம் உரிமம் பெற்ற, வணிக நடவடிக்கைகள் அனுமதி பெற்று இயங்கும் பிற வணிக நடவடிக்கைகள் தவிர்த்து வேலை வாய்ப்பு, ரியல் எஸ்டேட் மற்றும் பிற முதலீடுகளிலிருந்து கிடைக்கும் தனிநபர் சம்பாதித்த வருமானத்திற்கு கார்ப்பரேட் வரி விதிக்கப்படாது என்றும் கூறப்பட்டுள்ளது.