சினிமா செய்திகள்
ஜெயலலிதாவை அடுத்து முக ஸ்டாலின் வாழ்க்கை வரலாறு திரைப்படம்: இயக்குவது யார்?
முன்னாள் முதல்வர் ஜெயலலிதாவின் வாழ்க்கை வரலாறு ’தலைவி’ என்ற பெயரில் திரைப்படமாக உருவாகி சமீபத்தில் வெளியானது என்பதும் இந்த படம் மிகப்பெரிய வெற்றி பெற்றது என்பதும் தெரிந்ததே. இந்த நிலையில் ஜெயலலிதாவை அடுத்து தமிழக முதல்வர் முக ஸ்டாலின் அவர்களின் வாழ்க்கை வரலாறு திரைப்படம் உருவாக உள்ளதாக தகவல்கள் வெளியாகியுள்ளன.
பிரதமர் மோடி உள்பட பல அரசியல் தலைவர்களின் திரைப்படங்கள் அவ்வப்போது இந்தியாவில் உருவாகி வருகிறது என்பதும் அந்த வகையில் தமிழக முதல்வர் முக ஸ்டாலின் அவர்களின் வாழ்க்கை வரலாறு திரைப்படத்தை உருவாக்க இயக்குனர் சமுத்திரகனி முயற்சி செய்து வருவதாகவும் பேட்டி ஒன்றில் தெரிவித்துள்ளார்.
திமுகவுடன் மிகவும் நெருக்கமாக இருக்கும் நடிகர் போஸ் வெங்கட் அவர்களுடன் இணைந்து சமுத்திரகனி இந்த படத்தை இயக்குவார் என்றும் இந்த படத்தின் திரைக்கதை அமைப்பதில் இருவரும் பிஸியாக இருப்பதாகவும் தகவல்கள் வெளியாகியுள்ளன.
போஸ் வெங்கட் தனது 25ஆவது நண்பன் என்றும் அவர் முதலமைச்சர் முக ஸ்டாலின் அவர்களை பற்றி பல அற்புதமான விஷயங்களை கூறினார் என்றும், முதலமைச்சர் அவ்வளவு சாதாரணமாக இந்த பதவிக்கு வந்துவிடவில்லை என்றும் பல சவால்களை சந்தித்த பின் தான் இந்த பதவிக்கு வந்துள்ளார் என்றும் அவர் கூறினார் என்றும், இந்த தகவல்கள் எனக்கு பிரமிப்பாக இருந்தது என்றும் இதனை அடுத்து முக ஸ்டாலின் அவர்களின் வாழ்க்கை வரலாறு திரைப்படத்தை இயக்க முடிவு செய்ததாகவும் சமுத்திரகனி தெரிவித்துள்ளார்.
மேலும் இந்த படத்தின் திரைக்கதை முடிந்தவுடன் உதயநிதி ஸ்டாலின் அவர்களிடம் காட்டி ஒப்புதல் பெற்று அதன் பிறகு இந்த படத்தின் பணிகள் தொடங்கும் என்றும் சமுத்திரக்கனி அவர்கள் தெரிவித்துள்ளார்.
ஏற்கனவே மேற்கு வங்க முதல்வர் மம்தா பானர்ஜியின் வாழ்க்கை வரலாறு திரைப்படத்தை உருவாக்க திரிணாமுல் காங்கிரஸ் திட்டமிட்டுள்ளது என்பதும் இந்த படத்தை 2024 ஆம் ஆண்டு நடைபெறவிருக்கும் பாராளுமன்றத் தேர்தலுக்கு முன் இந்தியா முழுவதும் வெளியிட திட்டமிட்டிருப்பதாகவும் கூறப்படுகிறது. அதேபோல் தமிழக முதல்வர் முக ஸ்டாலின் அவர்களின் வாழ்க்கை வரலாறு திரைப்படமும் பாராளுமன்றத் தேர்தலுக்கு முன்பே வெளியிட வாய்ப்பு இருப்பதாக கூறப்படுகிறது.