தமிழ்நாடு
டிடிவி தினகரனை சந்தித்த அமைச்சர் விஜயபாஸ்கர்: அடுத்த அதிரடி!
துணை முதல்வர் ஓ.பன்னீர்செல்வம் அம்மா மக்கள் முன்னேற்றக்கழகத்தின் துணைப் பொதுச்செயலாளர் டிடிவி தினகரனை சந்தித்ததாக சமீபத்தில் வெளியான தகவல் பெரும் பரபரப்பை ஏற்படுத்தியது. இந்நிலையில் தற்போது அமைச்சர் விஜயபாஸ்கரும் டிடிவி தினகரனை சந்தித்ததாக தகவல் வெளியாகியுள்ளது.
தினகரன் ஆதரவாளரான தங்க தமிழ்செல்வன் ஓபிஎஸ், தினகரன் குறித்தான சந்திப்பு குறித்து முதன்முதலில் மீடியாவில் பேசினார். எடப்பாடி பழனிச்சாமி ஆட்சியை கவிழ்க்க ஓபிஎஸ் தினகரனை சந்தித்ததாக தங்க தமிழ்செல்வன் கூறினார். இதனையடுத்து விஷயம் காட்டுத்தீ போல பரவ அரசியல் வட்டாரத்தில் பரபரப்பு ஏற்பட்டது. இதனையடுத்து தினகரனும் செய்தியாளர்களை சந்தித்து ஓபிஎஸ் தன்னை சந்தித்தது உண்மை என நடந்ததை கூறி விளக்கம் அளித்தார்.
இது அதிமுகவில் பெரும் குழப்பத்தை ஏற்படுத்த உடனடியாக ஓபிஎஸ் செய்தியாளர்களை சந்தித்து தினகரன் அழைத்ததின் பேரிலேயே அங்கு சென்றதாகவும், அப்போது தினகரன் தான் அவரை முதல்வராக்க பேசியதாகவும், தனக்கு அதில் உடன்பாடு இல்லை என்பதால் அங்கிருந்து வந்துவிட்டேன் எனவும் விளக்கம் கூறினார்.
இந்த விவகாரம் முடிவதற்குள் அடுத்ததாக அமைச்சர் விஜயபாஸ்கரும் தினகரனை சந்தித்த தகவல் வந்துள்ளது. திருச்சியில் இன்று செய்தியாளர்களை சந்தித்த அமமுக கட்சியின் துணைப் பொதுச்செயலாளர் தினகரன், தமிழக துணை முதல்வர் ஓ.பன்னீர்செல்வத்தைத் தவிர, தமிழக சுகாதாரத்துறை அமைச்சர் விஜயபாஸ்கரும், காலையில் நடைப் பயிற்சி செய்யும்போது சந்தித்தார் என கூறி பரபரப்பை ஏற்படுத்தியுள்ளார். இதனால் அதிமுக வட்டாரத்தில் மீண்டும் குழப்பம் ஏற்பட்டுள்ளது.