’மாஸ்டர்’ கடந்து வந்த பாதை: ஒருவருட கொண்டாட்டத்தில் படக்குழுவினர் வெளியிட்ட வீடியோ!

தளபதி விஜய் நடித்த ’மாஸ்டர்’ திரைப்படம் கடந்த ஆண்டு ஜனவரி 13-ஆம் தேதி வெளியான நிலையில் இன்றுடன் அந்த படம் வெளியாகி ஓராண்டு நிறைவு பெற்றதை அடுத்து விஜய் ரசிகர்கள் டுவிட்டரில் கொண்டாடி வருகின்றனர். இந்த நிலையில் படக்குழுவினரும் இதுகுறித்த வீடியோ ஒன்றை வெளியிட்டுள்ளனர். அந்த வீடியோவில் ’மாஸ்டர்’ பட அறிவிப்பு வெளியானதிலிருந்து ரிலீஸானது வரை உள்ள சில காட்சிகள் உள்ளன என்பது குறிப்பிடத்தக்கது.

’மாஸ்டர்’ திரைப்படம் குறித்த அறிவிப்பு கடந்த 2019ஆம் ஆண்டு ஆகஸ்ட் 24ஆம் தேதி வெளியானது. இதனை அடுத்து அந்த படத்தின் படப்பிடிப்பு அக்டோபர் 3ஆம் தேதி தொடங்கியது என்றும், அதன் பின்னர் அந்த படத்தில் விஜய் சேதுபதி, மாளவிகா மோகனன் உள்ளிட்டோர் இணைந்ததும், அதன் பின்னர் படிப்படியாக படப்பிடிப்பு நடைபெற்றதுமான காட்சிகள் அந்த வீடியோவில் உள்ளன.

முதல் கட்டமாக டெல்லியிலும் பிறகு ஷில்லாங் என்ற சிறைச்சாலை பகுதியிலும் சென்னை மற்றும் நெய்வேலியில் இந்த படத்தின் படப்பிடிப்பு நடந்த காட்சிகள் அந்த வீடியோவில் உள்ளது. குறிப்பாக நெய்வேலியில் படப்பிடிப்பு நடந்து கொண்டிருந்தபோது திடீரென விஜய் வீட்டில் வருமான வரி சோதனை நடந்தது என்பதும் அந்த சோதனைக்கு பின்னர் விஜய் வீட்டில் எதுவும் கைப்பற்றப்படவில்லை என்ற செய்தி வந்ததும் அந்த வீடியோவில் குறிப்பிடப்பட்டுள்ளன. மேலும் நெய்வேலியில் ரசிகர்கள் முன் விஜய் தோன்றி கையை தூக்கிய காட்சியும் இந்த வீடியோவில் உள்ளன என்பது குறிப்பிடத்தக்கது.

இதனை அடுத்து இசை வெளியீட்டு விழா நடந்த காட்சிகள் அதனை அடுத்து அந்த படத்தில் இடம்பெற்ற ’வாத்தி கம்மிங்’ என்ற பாடலுக்கு திரையுலக பிரபலங்கள் மற்றும் கிரிக்கெட் நட்சத்திரங்கள் டான்ஸ் ஆடிய காட்சிகள் ஆகியவையும் உள்ளன. இந்த நிலையில் திடீரென ரிலீஸ் நேரத்தில் கொரோனா வைரஸ் பாதிப்பு ஏற்பட்டதும் அதனால் ’மாஸ்டர்’ படத்தின் ரிலீஸ் பல மாதங்கள் தள்ளி வைக்கப்பட்ட அறிவிப்பு வெளியான காட்சிகளும் உள்ளன.

கிட்டத்தட்ட ஒரு வருடம் கழித்து ’மாஸ்டர்’ திரைப்படம் ரிலீஸ் தேதி ஜனவரி 13-ஆம் தேதி என அறிவிக்கப்பட்டதும் 50% திரையரங்குகளில் 50 சதவீத பார்வையாளர்கள் மட்டுமே அனுமதி என்ற நிலையில் வெளியாகி அதன் பின் 100% மாற்றப்பட்டதும் இந்த படம் ஏற்படுத்திய அபாரமான வசூல் குறித்த காட்சிகளும் உள்ளன. ஜனவரி 13-ஆம் தேதி ரிலீஸானதும் அதற்கு ரசிகர்கள் கொடுத்த வரவேற்பு அனைத்து வசூல் சாதனையையும் உடைத்ததும் அந்த வீடியோவில் குறிப்பிட்டுள்ளனர். இந்த வீடியோ தற்போது வைரல் ஆகி வருகிறது என்பது குறிப்பிடத்தக்கது.