மணிகர்ணிகா: தி குயின் ஆஃப் ஜான்சி விமர்சனம்!

குயின் படத்தில் நடித்து தேசிய விருது வென்ற கங்கனா ரனாவத் நிஜ குயினாகவே நடித்துள்ள படம் தான் மணிகர்ணிகா.

சுதந்திர போராட்ட வீரமங்கை ஜான்சி ராணி லக்‌ஷ்மிபாயை நாம எல்லாரும் பள்ளி பாடப்புத்தகத்தில் படித்திருப்போம், அதனை திரைப்படமாக 100 மடங்கு வேகத்துடனும் ஆக்ரோஷத்துடனும் விருந்தளித்துள்ளார் கங்கனா ரனாவத்.

நடிப்பை தாண்டி இந்த படத்தின் மூலம் இயக்குநராக புரொமோட் ஆகியிருக்கும் கங்கனாவுக்கு வாழ்த்துகள்.

இயக்குநர் ராதாகிருஷ்ண ஜகர்லமுடி மற்றும் கங்கனா ரனாவத் இணைந்து இயக்கியுள்ள மணிகர்ணிகா படத்திற்கு மற்றொரு பலமாக இருப்பவர், இசையமைப்பாளர் சங்கர் – இஷான் –லாய்.

மணிகர்ணிகாவின் கதை தான் என்ன?

சத்ரிய குல பெண்ணாக இல்லாவிட்டாலும், வீரமங்கையாக வளரும் மணிகர்ணிகாவை, ஜான்சி ராஜா கங்காதர் ராவுக்கு மணமுடித்து வைக்கின்றனர். ஆங்கிலேயருக்கு அடிமைப்பட்டு கிடக்கும் அவர், வளையல் அணிந்த கையுடன் உள்ளார். ராஜாவை திருமணம் செய்த பின்னர், மணிகர்ணிகா லக்‌ஷ்மிபாயாக பெயர் மாற்றம் பெறுகிறார்.

ராஜாவையும் மணிகர்ணிகாவுக்கு பிறக்கும் குழந்தையையும், ராஜ்யத்தில் இருக்கும் சதிகாரன் விஷம் வைத்து கொல்கிறான். சாகும் தருவாயில், மீண்டும் மணிகர்ணிகாவாக மாறி ஜான்சி நாட்டை வெள்ளையர்களிடமிருந்து மீட்க வேண்டும் என ராஜா கேட்டுக் கொள்ள, வெள்ளையர்களை அழிக்க போரிடும் வீரமங்கையாக ஜான்சி ராணியாக மணிகர்ணிகா மாறுவதும், வெள்ளையர்களின் சூழ்ச்சியால் போரில் வீரமரணம் அடைவதுமென சுதந்திர உணர்வை ஒவ்வொரு காட்சியிலும் ஈட்டியாய் நெஞ்சில் பாய்ச்சியுள்ளார் கங்கனா ரனாவத்.

பிளஸ்:

கங்கனா ரனாவத்தின் நடிப்பும் இயக்கமும் படத்திற்கு மிகப்பெரிய பலமாக அமைந்துள்ளது. வீரமங்கையாக ராணியாக, கணவன் மற்றும் குழந்தையை இழந்த அபலையாக, மீண்டும் தாய் நாட்டிற்கு போராடும் ஜான்சி ராணியாக என அனைத்து இடங்களிலும் சிக்ஸர் அடித்துள்ளார் கங்கனா.

மைனஸ்:

கங்கனா ரனாவத்தை தவிர மற்ற கதாபாத்திரங்களுக்கு பெரிய முக்கியத்துவம் தரப்படவில்லை. முதல் பாதியில் அடிக்கடி வந்து தொந்தரவு செய்யும் பாடல்கள். பின்னணி இசை சிறப்பாக இருந்தாலும், இத்தனை பாடல்கள் தேவையற்றது. பாகுபலியை மிஞ்சாத போர்க்காட்சிகள் இவை படத்தின் மைனஸாக இருந்தாலும், சுதந்திர உணர்வை ஊட்டும் காட்சிகளால் மறக்கடிக்கப்படுகின்றன.

வீரபாண்டிய கட்டபொம்மன், பகத்சிங், வேலுநாச்சியார், மருது சகோதரர்கள், கொடிகாத்த குமரன் போன்றவர்களின் வரலாற்றை படிக்கும் போதே வீர உணர்ச்சி கொழுந்து விட்டு எரியும் அல்லவா? அதே உணர்ச்சியை திரையில் காட்சிகளாக கொடுத்து குடியரசு தினத்துக்கான சரியான ரிலீசாக மணிகர்ணிகா ரிலீசாகி இருப்பதிலேயே வென்று விட்டது.

சினி ரேட்டிங்: 3.75/5.