சினிமா
தனுஷை ஓவர்டேக் செய்த யோகிபாபு…ஆஸ்கர் விருது லிஸ்ட்டில் ‘மண்டேலா’…
தமிழ் திரையுலகில் சின்ன சின்ன வேடங்களில் நடித்தவர் பாபு. இயக்குனர் அமீர் கதாநாயகனாக நடித்த ‘யோகி’ படத்தில் நடித்ததால் யோகி பாபு என அழைக்கப்பட்டார். அதுவே அவரின் பெயராக தற்போது மாறிவிட்டது.
அதன்பின் பல திரைப்படங்களில் காமெடியனாக நடித்து தற்போது முன்னணி நகைச்சுவை நடிகராக மாறியுள்ளார். அனைத்து முன்னணி நடிகர்களின் திரைப்படங்களிலும் அவர் நடித்து வருகிறார்.
ஒரு சில திரைப்படங்களில் கதாநாயகனாகவும் நடித்தார். அப்படி அவர் நடித்த திரைப்படம்தான் மண்டேலா. கிராமத்தில் நடக்கும் பஞ்சாயத்து தலைவர் தேர்தலில் ஒரு ஓட்டு கூட எவ்வளவு முக்கியமானது என்பதை இப்படம் நகைச்சுவையுடன் விவரித்தது. இப்படம் ஒரு சிறந்த படம் என பலரும் பாராட்டியிருந்தனர்.
இந்நிலையில், இப்படம் இந்த வருடத்திற்கான ஆஸ்கர் விருதுக்காக இந்தியா சார்பாக பரிந்துரைக்கப்படும் 14 படங்கள் கொண்ட பட்டியலில் இப்படம் இடம் பெற்றுள்ளது. தனுஷ் நடித்த கர்ணன் திரைப்படம் ஆஸ்கர் விருதுக்கு பரிந்துரைக்கப்படும் என அப்போது செய்திகள் வெளியானது. ஆனால், யோகிபாபு படம் அந்த இடத்தை பிடித்துள்ளது.
இதையடுத்து, யோகிபாபுவுக்கும், மண்டேலா படக்குழுவினருக்கும் ரசிகர்களும், திரை உலகினரும் பாராட்டுக்களை தெரிவித்து வருகின்றனர்.
