தோனி பிரதமர், விஜய் முதல்வர்: மதுரை ரசிகர்களின் அட்ராசிட்டி போஸ்டர்!

அடுத்த தேர்தலில் பிரதமர் வேட்பாளர் தல தோனி என்றும், முதல்வர் வேட்பாளர் தளபதி விஜய் என்றும் மதுரை ரசிகர்கள் நகர் முழுவதும் போஸ்டர் ஒட்டி இருப்பது பெரும் பரபரப்பை ஏற்படுத்தி உள்ளது.

தல தோனி மற்றும் தளபதி விஜய் நேற்று ’பீஸ்ட்’ படத்தின் படப்பிடிப்பு தளத்தில் சந்தித்தது பெரும் பரபரப்பை ஏற்படுத்தியது என்பதும் இது குறித்த புகைப்படங்கள் வீடியோக்கள் இணையதளங்களில் வைரலாகியது என்பதை ஏற்கனவே பார்த்தோம்.

மேலும் இந்த சந்திப்பின்போது சென்னை சூப்பர் கிங்ஸ் அணியின் விளம்பர படத்தில் விஜய் நடிக்க வேண்டும் என்று தோனி கோரிக்கை விடுத்ததாகவும் அதேபோல் ’பீஸ்ட்’ படத்தில் ஒரு சிறப்பு தோற்றத்தில் நடிக்க வேண்டும் என்று விஜய் தோனியிடம் கோரிக்கை விடுத்ததாகவும் ரசிகர்கள் மத்தியில் செய்திகள் பரவி வருகிறது. இது எந்த அளவுக்கு உண்மை என்பதை பொறுத்திருந்து தான் பார்க்க வேண்டும்.

இந்த நிலையில் நேற்றைய சந்திப்பின் போது தோனி மற்றும் விஜய் ஆகிய இருவரும் மத்தியில் ஆட்சியை பிடிப்பது குறித்தும் மாநிலத்தில் ஆட்சியைப் பிடிப்பது குறித்தும் பேசியதாக மதுரை ரசிகர்கள் போஸ்டர் ஒட்டி இருப்பது பெரும் பரபரப்பை ஏற்படுத்தி உள்ளது.

இந்தியாவின் பிரதமர் வேட்பாளராக தோனியும் தமிழகத்தின் முதல்வர் வேட்பாளராக விஜய்யும் மாற வேண்டும் என்று மதுரை ரசிகர்கள் அந்த போஸ்டர்களில் குறிப்பிட்டு நகர் முழுவதும் ஒட்டியுள்ளனர். மதுரை வடக்கு மாவட்ட இளைஞரணி தலைமை தளபதி விஜய் மக்கள் இயக்கத்தின் சார்பில் ஒட்டப்பட்டுள்ள இந்த போஸ்டர்கள் மதுரையில் பெரும் பரபரப்பை ஏற்படுத்தி உள்ளது.

மேலும் மதுரைக்காரர்களால் மட்டும்தான் இப்படி யோசிக்க முடியும் என்றும் நெட்டிசன்கள் இந்த போஸ்டருக்கு கமெண்ட்ஸ் அளித்து வருகின்றனர். ஆனால் அரசியலில் எதுவும் நடக்கலாம் என்பதால் தோனி பிரதமர் வேட்பாளராகவும் விஜய் முதல்வர் வேட்பாளராக வருவதற்கு வாய்ப்பு இருப்பதாகவும் ஒரு சிலர் கூறி வருகின்றனர்.