தமிழ்நாடு
ஏமாற்றுவதற்கு திமுகவிடம் இருந்துதான் நாம் கற்றுக்கொள்ள வேண்டும்: எல் முருகன்
ஏமாற்றுவதற்கு திமுகவிடம் இருந்து தான் நாம் கற்றுக்கொள்ள வேண்டும் என பேட்டி ஒன்றில் தமிழக பாஜக தலைவர் எல் முருகன் அவர்கள் கூறியிருப்பது பெரும் பரபரப்பை ஏற்படுத்தி உள்ளது.
நேற்று திருச்சியில் திமுக தலைவர் முக ஸ்டாலின் அவர்கள் இல்லத்தரசிகளுக்கு மாதம் ரூபாய் ஆயிரம் வழங்கப்படும் என்பது உள்பட 7 முக்கிய திட்டங்களை அறிவித்தார். இந்த அறிவிப்பு குறித்து இன்று செய்தியாளர்களை சந்தித்த தமிழக பாஜக தலைவர் எல் முருகன் அவர்கள் கடுமையாக விமர்சனம் செய்தார்.
திமுக ஏற்கனவே விவசாயிகளுக்கு இரண்டு ஏக்கர் நிலம் தரப்படும் என்று வாக்குறுதி கொடுத்தது. அந்த வாக்குறுதி என்ன ஆனது? இந்த வாக்குறுதியை நிறைவேற்றாத திமுக குடும்ப தலைவிகளுக்கு ரூபாய் 1000 என்ற அறிவிப்பை எப்படி நிறைவேற்றும்? ஏமாற்றுவதற்கு திமுகவிடம் இருந்துதான் கற்றுக்கொள்ளவேண்டும்.
திமுக மற்றும் காங்கிரஸ் கூட்டணி ஆட்சியில் இருந்தபோது ஊழல் மட்டுமே செய்தது. மத்திய அரசின் திட்டங்களான விஷன் 7 என்ற பெயரில் வெளியானதை தான் முக ஸ்டாலின் காப்பியடித்து கூறிவருகிறார்.
திமுக அறிவித்த எழில்மிகு திட்டம் ஏற்கனவே மத்திய அரசின் ஸ்மார்ட் சிட்டி திட்டமாக அமல்படுத்தப்பட்டுள்ளது. மனித கழிவுகளை அகற்றுவதற்கு கருவிகளை மத்திய அரசு ஏற்கனவே வழங்கிவருகிறது. திமுக அறிவிப்பு எல்லாமே ஒரு ஏமாற்று வேலை. ஏமாற்றுவதற்கு அவர்களிடம் தான் நாம் கற்றுக்கொள்ள வேண்டும்’ என்று கூறியுள்ளார். எல் முருகனின் இந்த பேட்டி பெரும் பரபரப்பை ஏற்படுத்தியுள்ளது.
