சினிமா செய்திகள்
தான் நடிக்கும் படத்தை மொத்தக் குடும்பத்துடன் இணைந்து தயாரிக்கும் கீர்த்தி சுரேஷ்..!
குடும்பத்துடன் இணைந்து தான் நடிக்கும் படத்தை தானே தயாரிக்கிறார் நடிகை கீர்த்தி சுரேஷ்.
மலையாளத்தில் ‘வாஷி’ என்னும் திரைப் படத்தில் நாயகி ஆக நடித்து வருகிறார் நடிகை கீர்த்தி சுரேஷ். இந்தப் படத்தில் நடிகர் டொவினோ தாமஸ் நாயகன் ஆக நடிக்கிறார். இந்தத் திரைப்படத்தை நடிகை கீர்த்தி சுரேஷே தயாரித்தும் வருகிறார். கீர்த்தி சுரேஷ் மட்டுமல்லாது அவரது அப்பா சுரேஷ் குமார், அம்மா மேனகா, அக்கா ரேவதி ஆகியோர் கீர்த்தி உடன் இணைந்து இந்தப் படத்தைத் தயாரிக்கின்றனர்.
வாஷி படத்தின் போஸ்டரை மலையாள சூப்பர் ஸ்டார் மோகன் லால் தனது ட்விட்டர் பக்கத்தில் வெளியிட்டு வாழ்த்து தெரிவித்துள்ளார். கீர்த்தி சுரேஷ் குடும்பத்தார் ரேவதி கலாமந்திர் என்னும் தயாரிப்பு நிறுவனத்தை நீண்ட ஆண்டுகளாகவே நடத்தி வருகின்றனர். நடிகர் கீர்த்தி சுரேஷ் தற்போது சூப்பர் ஸ்டார் ரஜினிகாந்த் உடன் அண்ணாத்த படத்திலும் இயக்குநர் செல்வராகவன் உடன் இணைந்து சாணிக்காயிதம் படத்திலும் நடித்து வருகிறார் என்பது குறிப்பிடத்தக்கது.