தமிழ்நாடு
அம்மா உணவகத்தில் கருணாநிதி படம்: பெரும் சர்ச்சை
![amma unavagam karunanidhi - Bhoomitoday](https://www.bhoomitoday.com/wp-content/uploads/2021/11/amma-unavagam-karunanidhi.jpg)
மதுரையில் உள்ள அம்மா உணவகத்தில் ஒருபக்கம் ஜெயலலிதாவின் படம் இருக்கும் நிலையில் இன்னொரு பக்கம் கருணாநிதியின் படம் வைக்கப்பட்டுள்ளது பெரும் சர்ச்சையை ஏற்படுத்தி உள்ளது.
மதுரை மாநகராட்சியில் உள்ள ஜெய்ஹிந்த்புரம் என்ற பகுதியில் அம்மா உணவகம் பெயர் பலகை திடீரென மாற்றப்பட்டு உள்ளது. முன்னாள் முதல்வர் ஜெயலலிதா மற்றும் கருணாநிதி படங்கள் பொறிக்கப்பட்ட புதிய பெயர் பலகை வைக்கப்பட்டுள்ளதை பார்த்து அதிமுகவினர் அந்த பெயர் பலகையை உடனடியாக அகற்ற வேண்டும் என எதிர்ப்பு தெரிவித்து வருவதால் பெரும் பரபரப்பு ஏற்பட்டுள்ளது.
இது குறித்து மாநகராட்சி அதிகாரிகள் கூறியபோது மதுரையில் செயல்படும் அம்மா உணவக பெயர் பலகையில் முன்னாள் முதல்வர் கருணாநிதி புகைப்படமும் இடம் பெற்றது குறித்து தங்களுக்கு தெரியாது என்றும் சமூக வலைதளங்களில் தகவல் பரவிய பிறகு எங்களுக்கு தெரிய வந்தது என்பதும் படத்தை வைக்க அரசு தரப்பில் எந்த ஒரு அறிவுறுத்தலும் இல்லை என்றும் இது குறித்து விசாரணை நடத்தப்படும் என்றும் தெரிவித்துள்ளனர்.
ஆனால் இதுகுறித்து திமுகவினரிடம் கேட்டபோது கட்சி தலைமையிடம் தெரிவித்துவிட்டு தான் இவ்வாறு புகைப்படம் வைத்ததாகவும் அவர்களுடைய அறிவுறுத்தலின்படி அடுத்த கட்ட நடவடிக்கை எடுக்கப்படும் என்றும் தெரிவிக்கப்பட்டுள்ளது.
மதுரையில் உள்ள அம்மா உணவகத்தில் திடீரென கருணாநிதியின் புகைப்படமும் வைக்கப்பட்டுள்ளது அந்த பகுதியில் பெரும் பரபரப்பை ஏற்படுத்தி உள்ளது.