‘மாஸ்டர்’ வசூலை மிஞ்சியதா ‘சுல்தான்’..? 5 நாட்களில் சாதனை!

கார்த்தி நடிப்பில் கடந்த வாரம் வெளியான சுல்தான், பாக்ஸ் ஆஃபீஸ் ஹிட் அடித்துள்ளது. மசாலா கலந்த கமர்ஷியல் படம் என்பதால் பெரும் அளவிலான ரசிகர்கள் கூட்டம் திரையரங்கை நிரப்பி வருகின்றன. இந்நிலையில் கடந்த ஜனவரி மாதம் ரிலீஸான தளபதி விஜய்யின் ‘மாஸ்டர்’ பட வசூலை ‘சுல்தான்’ மிஞ்சியுள்ளதாக தகவல்கள் வந்துள்ளன.

கார்த்தி கடைசியாக கைதி படத்தில் நாயகன் ஆக நடித்து பெரும் பாராட்டைப் பெற்றிருந்தார். அதன் பின்னர் நடித்த சுல்தான் படம் கொரோனா கட்டுப்பாடுகளால் தாமதம் ஆகிக் கொண்டே இருந்தது. படத்தை ஓடிடி-யில் வெளியிடுவதாக முதலில் அறிவித்த தயாரிப்பு நிறுவனம் பின்னர் தியேட்டர் ரிலீசுக்குப் படத்தைத் தயார் செய்தது.

சுல்தான் படத்தில் கார்த்தி-க்கு ஜோடியாக நடிகை ராஷ்மிகா மந்தனா நடித்துள்ளார். தெலுங்கு, கன்னடம் மொழித் திரைப்படங்கள் மூலம் தமிழ் ரசிகர்களுக்கு ராஷ்மிகா பரிச்சயம் ஆனவர் தான் என்றாலும் சுல்தான் படம் மூலமாகத் தான் தமிழ் திரை உலகில் அறிமுகம் ஆகியுள்ளார் ராஷ்மிகா. இந்தப் படத்தை சிவகார்த்தியேனின் ‘ரெமோ’ படத்தை இயக்கிய பாக்கியராஜ் கண்ணன் இயக்கி உள்ளார்.

ட்ரீம் வாரியர்ஸ் பிக்சர்ஸ் நிறுவனம் சுல்தான் திரைப்படத்தைத் தயாரித்துள்ளது. சில நாட்களுக்கு முன்னர் சுல்தான் படத்தின் வெற்றி விழாவில் பேசிய தயாரிப்பாளர் எஸ்.ஆர்.பிரபு, ‘சுல்தான் திரைப்படம் இதுவரை 30 கோடி ரூபாய் வரை வசூல் செய்துள்ளது. அதில் தமிழகத்தில் 19 கோடி ரூபாயும், ஆந்திராவில் 5 கோடியும் அதிகபட்சமாக வசூல் செய்துள்ளது’ எனத் தெரிவித்தார். இது மாஸ்டர் படத்திற்கு இணையான வசூல் என்று கோலிவுட் தரப்பில் சொல்லப்பட்டு வருகிறது.