சினிமா செய்திகள்
கங்கனா ரனாவத்தின் ‘தலைவி’ ரிலீஸ் தேதி அறிவிப்பு!
தமிழகத்தில் இன்று முதல் திரையரங்குகள் திறக்கப்பட்ட நிலையில் நீண்ட காலமாக திரையரங்கு ரிலீசுக்காக காத்திருக்கும் திரைப்படங்களின் ரிலீஸ் தேதிகள் படிப்படியாக அறிவிக்கப்படும் என்று எதிர்பார்க்கப்பட்டது.
அந்த வகையில் முதல் படமாக முன்னாள் முதல்வர் ஜெயலலிதாவின் வாழ்க்கை வரலாறு திரைப்படமான ‘தலைவி’ திரைப்படத்தின் ரிலீஸ் தேதி தற்போது அதிகாரப்பூர்வமாக அறிவிக்கப்பட்டுள்ளது.
இந்த படம் திரையரங்குகளில் செப்டம்பர் 10-ஆம் தேதி முதல் வெளியாகும் என்று அறிவிக்கப்பட்டுள்ளதால் ரசிகர்கள் பெரும் மகிழ்ச்சி அடைந்துள்ளனர். செப்டம்பர் 10-ஆம் தேதி என்பது விநாயகர் சதுர்த்தி விடுமுறை தினம் என்பதால் இந்த படம் ஆரம்பகட்ட வசூலை குவிக்கும் என்று எதிர்பார்க்கப் படுகிறது. மேலும் இதே தினத்தில் விஜய்சேதுபதி ’லாபம்’, விஜய் ஆண்டனியின் ‘கோடியில் ஒருவன்’ உள்பட ஒரு சில திரைப்படங்களும் வெளியாகலாம் என்று எதிர்பார்க்கப்படுகிறது.
பிரபல இயக்குனர் விஜய் இயக்கத்தில் கங்கனா ரனாவத், அரவிந்த்சாமி, சமுத்திரக்கனி, பூர்ணா, நாசர், மதுபாலா, தம்பி ராமையா உள்பட பலர் நடித்துள்ளனர். இந்த படத்திற்கு ஜீவி பிரகாஷ் இசையமைத்துள்ளார் என்பது குறிப்பிடத்தக்கது.
தமிழ், தெலுங்கு, கன்னடம், மலையாளம், இந்தி என 5 மொழிகளில் இந்த படம் ஒரே நாளில் ரிலீசாக இருப்பதாகவும் கூறப்படுகிறது. கடந்த மார்ச் மாதமே இந்த படத்தின் சென்சார் தகவல்கள் வெளிவந்த நிலையில் திரையரங்குகள் திறப்பதற்காக தான் கடந்த ஆறு மாதங்களாக இந்த படம் காத்திருந்தது என்பது குறிப்பிடத்தக்கது.
