கிரிக்கெட்
டெல்லிக்கு முதல் வெற்றி: கொல்கத்தாவை போராடி வென்றது!
16வது ஐபிஎல் கிரிக்கெட் தொடரில் நேற்றிரவு நடைபெற்ற 28வது லீக் ஆட்டத்தில் டெல்லி கேப்பிட்டல்ஸ் அணி, கொல்கத்தா நைட் ரைடர்சுடன் மோதியது. மழையால் ஆட்டம் ஒரு மணி நேரம் தாமதம் ஆனது. டாஸ் வென்ற டெல்லி முதலில் பந்துவீச்சை தேர்வு செய்தது.
கொல்கத்தா திணறல்
கொல்கத்தா அணியில் லிட்டான் தாஸ் (4 ரன்), வெங்கடேஷ் அய்யர் (0), கேப்டன் நிதிஷ் ராணா (4 ரன்) என வரிசையாக வேகப்பந்து வீச்சுக்கு அவுட் ஆனார்கள். ரிங்கு சிங்கும் 6 ரன்களில் அவுட் ஆக, தொடக்க ஆட்டக்காரர் ஜாசன் ராய் 43 ரன்களை எடுத்தார். முகேஷ் குமாரின் கடைசி ஓவரில் ரஸ்செல் ‘ஹாட்ரிக்’ சிக்சர் அடித்து ஆறுதல் அளித்தார். நிர்ணயிக்கப்பட்ட 20 ஓவர்கள் முடிவில் கொல்கத்தா அணி 127 ரன்களுக்கு ஆல்-அவுட் ஆனது. ரஸ்செல் மட்டும் 38 ரன்களுடன் களத்தில் இருந்தார். டெல்லி தரப்பில் அன்ரிச் நோர்டியா, இஷாந்த் ஷர்மா, அக்ஷர் பட்டேல் மற்றும் குல்தீப் யாதவ் ஆகியோர் தலா 2 விக்கெட்டுகளை வீழ்த்தினர்.
டெல்லிக்கு முதல் வெற்றி
பின்னர் களமிறங்கிய டெல்லி அணியில் பிரித்வி ஷா 13 ரன்னிலும், மிட்செல் மார்ஷ் 2 ரன்னிலும், பில் சால்ட் 5 ரன்னிலும் அவுட் ஆனார்கள். வார்னர் 57 ரன்களில் சுழற்பந்து வீச்சாளர் வருண் சக்ரவர்த்தியின் பந்து வீச்சில் எல்.பி.டபிள்யூ. ஆனார். அதனைத் தொடர்ந்து மனிஷ் பாண்டே 21 ரன்னிலும், அமன்கான் ரன் எடுக்காமலும் அவுட் ஆகி வெளியேறினர். கடைசி ஓவரில் வெற்றிக்கு 7 ரன்கள் தேவைப்பட்ட நிலையில், அக்ஷர் படேல் டெல்லியின் வெற்றியை உறுதி செய்தார். டெல்லி அணி 19.2 ஓவர்களில் 6 விக்கெட்டுக்கு 128 ரன்கள் சேர்த்து 4 விக்கெட் வித்தியாசத்தில் வெற்றி பெற்றது. 6வது லீக்கில் ஆடிய டெல்லிக்கு இது தான் முதல் வெற்றியாகும்.
