கிரிக்கெட்
INDvAUS- இந்தியாவுக்கு அடி மேல் அடி… முகமது ஷமி ஆஸி. தொடரிலிருந்து விலகல்!
இந்தியா – ஆஸ்திரேலிய கிரிக்கெட் அணிகளுக்கு இடையேயான முதல் டெஸ்டில் இந்திய அணி, படுதோல்வியடைந்தது. தொடரில் இன்னும் 3 டெஸ்ட் போட்டிகள் மீதமிருக்கும் நிலையில், இந்திய அணியின் வேகப்பந்து வீச்சாளர் முகமது ஷமி காயம் காரணமாக விலகியுள்ளார் என்று தகவல் வந்துள்ளது.
முதல் டெஸ்டின் இரண்டாவது இன்னிங்ஸில் ஷமி, பேட்டிங் செய்து கொண்டிருந்த போது ஆஸ்திரேலிய பவுலர் பேட் கம்மின்ஸ் வீசிய பந்து அவரது விரலைப் பதம் பார்த்தது. இந்நிலையில் காயம் குறித்து எடுத்த ஸ்கேனில் ஷமிக்கு, எலும்பு முறிவு ஏற்பட்டுள்ளது தெரிய வந்துள்ளதாகவும், இதன் காரணமாக அவர் மீதமிருக்கும் டெஸ்ட் தொடரில் பங்கேற்பதற்கான வாய்ப்புகள் மிகக் குறைவு என்றும் சொல்லப்படுகிறது.
இந்தப் போட்டியோடு இந்திய கேப்டன் விராட் கோலி, தாயகம் திரும்புகிறார். இந்நிலையில் இந்திய அணியின் முக்கிய பந்துவீச்சாளர்களில் ஒருவரும் காயம் காரணமாக விலகுவது அணிக்கு பெரிய பின்னடைவாக பார்க்கப்படுகிறது.
