“அடேய்களா… நான் அவன் இல்லடா..!”- ஆஸி., வெற்றிக்குப் பின் தவறான டிம் பெய்னை ட்ரோல் செய்த ரசிகர்கள்

இந்திய கிரிக்கெட் அணி, ஆஸ்திரேலிய கிரிக்கெட் அணியை, டெஸ்ட் தொடரில் அவர்கள் மண்ணிலேயே வீழ்த்தி சாதனைப் படைத்துள்ளது. இதனால் இந்திய கிரிக்கெட் ரசிகர்கள் வெற்றிக் களிப்பில் உள்ளனர். இந்த வெற்றி சந்தோஷம் அதிகமாக தலைக்கேறிய சில இந்திய ரசிகர்கள், ஆஸ்திரேலிய கிரிக்கெட் அணியின் கேப்டன் டிம் பெய்னை ஆன்லைனில் ட்ரோல் செய்துள்ளனர். அதில் வேடிக்கையான விஷயம் என்னவென்றால், தாங்கள் யாரை ட்ரோல் செய்கிறோம் என்பது தெரியாமலேயே கலாய்த்து தள்ளியுள்ளனர் இந்திய ரசிகர்கள். அதாவது நிஜ டிம் பெய்னை ட்ரோல் செய்யாமல், டிம் பெய்ன் என்ற பெயருடைய ஒருவரை கேலி செய்துள்ளனர் ரசிகர்கள். இதனால் மனம் நொந்து போன அந்த ‘போலி’ டிம் பெய்ன், ‘நான் அவன் இல்லப்பா… என்ன விடுங்கப்பா’ எனக் கதறியுள்ளார்.

அவர், ‘நான் தான் ஆஸ்திரேலிய கிரிக்கெட் அணியின் கேப்டன் டிம் பெய்ன் என்று இந்திய கிரிக்கெட் ரசிகர்கள் தவறாக புரிந்து கொண்டுள்ளனர்.

இன்ஸ்டாகிரமிலும் ‘டிம் பெய்ன்’ என்று தேடினால் என் பெயர்தான் காண்பிக்கப்படுகிறது. அந்த பெய்ன், சமூக வலைதளங்களில் இல்லாத காரணத்தினால், டெஸ்ட் தொடர் தோல்விக்கு எனக்கு அர்ச்சனைகள் வந்து கொண்டிருக்கின்றன.

இதுவரை மட்டும் சுமார் 600 மெஸேஜ்கள் எனக்கு வந்து விட்டன. தொடர்ச்சியாக நட்புக்கான விருப்பங்களும் வந்து கொண்டிருக்கின்றன. அது மட்டுமில்லாமல் என் புகைப்படங்களில் அதிக கமென்டுகள் வந்து கொண்டிருக்கின்றன. அதில் சில கமென்டுகள் ரசிக்கும்படி உள்ளன’ என்று ஸ்மைலிகளுடன் தன் இன்ஸ்டா பக்கத்தில் பகிர்ந்துள்ளார்.

தனக்கு வந்த சில மெஸேஜ்களின் ஸ்க்ரீன் ஷாட்களையும் அந்த டிம் பெய்ன் பகிர்ந்துள்ளார். அவை இதோ: