இந்தியா
புதிய மற்றும் பழைய வரிமுறையை ஒப்பிட ஒரு கால்குலேட்டர்.. வருமான வரித்துறை அறிமுகம்..!
மத்திய நிதி அமைச்சர் நிர்மலா சீதாராமன் அவர்கள் சமீபத்தில் பட்ஜெட் தாக்கல் செய்த போது வரி விதிப்பு தொடர்பான முக்கிய அறிவிப்பை வெளியிட்டார். புதிய வரி விதிப்பின் மூலம் வரி செலுத்தும் முறையையும் பயன்படுத்திக் கொள்ளலாம் என்றும் அதே நேரத்தில் பழைய வரி விதிப்பு முறையும் அமலில் உள்ளது என்றும் அவர் தெரிவித்திருந்தார். இந்த நிலையில் புதிய வரி விதிப்பிற்கும் பழைய வரி விதிப்பிற்கும் உள்ள வித்தியாசம் என்ன? இரண்டுக்கும் உள்ள வரி வேறுபாடு என்ன? என்பதை எளிதில் தெரிந்து கொள்ளும் வகையில் புதிய கால்குலேட்டரை வருமானவரித்துறை அலுவலகம் அறிமுகம் செய்துள்ளது.
இந்தியாவின் நிதியமைச்சர் நிர்மலா சீதாராமன் வருமான வரி மாற்றங்களை அறிவித்த மூன்று வாரங்களுக்குப் பிறகு, புதிய வரி விதிப்பு தொடர்பாக வருமான வரித்துறை வரி செலுத்துவோருக்கு உதவ வருமான வரித்துறை ஒரு நடவடிக்கையை எடுத்துள்ளது.
வருமான வரித்துறை அறிமுகம் செய்துள்ள இந்த கால்குலேட்டர் வருமான வரி இணையதளத்தில் உள்ளது. இந்த கால்குலேட்டரில் 115BAC பிரிவின்படி தனிநபர்/HUF/AOP/BOI/ வரியில் புதிய வரி முறைக்கு எதிராக பழைய வரி முறையை சரிபார்க்கலாம்.
பழைய மற்றும் புதிய வரி விதிப்பின் கீழ் தாங்கள் எவ்வளவு மொத்த வரி செலுத்த வேண்டும், அதேபோல் புதிய விதிப்பின் கீழ் எவ்வளவு வரி சேமிப்பு கிடைக்கும் என்பதைக் அறிந்து கொள்ளலாம். வரி செலுத்துவோர் தங்களின் மொத்த சம்பளம், தகுதியான விலக்குகள் போன்ற தேவையான தகவல்களை நிரப்பினால் இந்த கால்குலேட்டர் அனைத்தையும் கணக்கிட்டு சொல்லும்.
வருமான வரி இணையதளம் அறிமுகம் செய்துள்ள இந்த கால்குலேட்டர் அடிப்படை வரி கணக்கீடுகளை பொதுமக்கள் விரைவாகவும் எளிதாகவும் அணுகுவதை நோக்கமாகக் கொண்டது என்றும் ரிட்டன்களை தாக்கல் செய்வதற்கு, தொடர்புடைய சட்டங்கள், விதிகள் போன்றவற்றில் உள்ள விதிகளின்படி சரியான கணக்கீடு செய்யப்படும் என்றும் வருமான வரித்துறை தெரிவித்துள்ளது.
புதிய வரிவிதிப்பின்கீழ், நிதியமைச்சர் சீதாராமன் பட்ஜெட் 2023 அறிவிப்புக்குப் பிறகு வரி விகிதங்கள் குறித்த தகவல்கள் இதோ:
3 லட்சம் வரை: வரி ஏதும் இல்லை
ரூ 3 லட்சம்- ரூ 6 லட்சம்: 5% வரி
ரூ 6 லட்சம் – ரூ 9 லட்சம்: 10% வரி
ரூ 9 லட்சம்-ரூ 12 லட்சம்: 15% வரி
ரூ 12 லட்சம்- ரூ 15 லட்சம்: 20% வரி
15 லட்சத்திற்கு மேல்: 30% வரி