தமிழ்நாடு
முதுகெலும்பு இல்லாத நத்தை: கமலை மீண்டும் சீண்டும் எச்.ராஜா!
மக்கள் நீதி மய்யம் கட்சியின் தலைவரும் நடிகருமான கமல்ஹாசனை பாஜக தேசிய செயலாளர் எச்.ராஜா மீண்டும் டுவிட்டரில் சீண்டியுள்ளார். அவரை முதுகெலும்பு இல்லாத நத்தை என விமர்சித்துள்ளார்.
தேர்தல் ஆணையத்தில் பதிவு செய்யப்பட்ட, ஆனால் அங்கீகரிக்கப்படாத 39 கட்சிகளுக்கான சின்னங்கள் நேற்று ஒதுக்கப்பட்டுள்ளன. இதில் கமல்ஹாசனின் மக்கள் நீதி மய்யத்திற்கு பேட்டரி டார்ச் சின்னம் ஒதுக்கப்பட்டது. இதனையடுத்து டார்ச் லைட் சின்னம் குறித்து மத்திய அமைச்சர் பொன்.ராதாகிருஷ்ணன் விமர்சித்திருந்தார். இந்த சூழ்நிலையில் சென்னை விமான நிலையத்தில் செய்தியாளர்களை சந்தித்த கமல்ஹாசனிடம் பொன்.ராதாகிருஷ்ணனின் விமர்சனம் குறித்து கேள்வி எழுப்பப்பட்டது.
இதற்கு பதில் அளித்த கமல், நோட்டாவால் காணாமல் போன பாஜகவை பேட்டரி டார்ச் வைத்து தேடப் போவதாக கூறி டார்ச் லைட்டும் அடித்தும் பதிலளித்தார். மேலும் நோட்டா சின்னத்தை பாஜகவுக்கு ஒதுக்கினால் சரியாக இருக்கும் என்று அவர் நக்கலடித்தார். இதற்கு பாஜக தேசிய செயலாளர் எச்.ராஜா மிகவும் வன்மையாக டுவிட்டரில் பதில் அளித்துள்ளார்.
அதில், விஸ்வரூபம் படத்திற்கு இஸ்லாமிய தீவிரவாதிகள் எதிப்பு தெரிவித்த போது பணத்திற்காக பிழைப்பிற்காக அழுது புலம்பி மண்டியிட்டு வெட்டுக்களை ஏற்ற முதுகெலும்பு இல்லாத நத்தை நாடாளும் பாஜகவை நக்கலடிப்பது வேடிக்கையாக உள்ளது. தேர்தலுக்குப் பிறகு இவரை தேட வேண்டியிருக்கும் என தெரிவித்துள்ளார். இதனையடுத்து இது அநாகரிகமான மிரட்டல் என திராவிடர் கழக சுப வீரபாண்டியன் தெரிவித்துள்ளார்.
