தமிழ்நாடு
ஸ்டாலினுக்குப் பிறகு உதயநிதி புறப்பட்டு விட்டார், திமுகவில் வேறு ஆட்களே இல்லையா? எடப்பாடி பழனிசாமி கேள்வி!
வேலூர் மக்களவை தேர்தலுக்கான பிரச்சாரத்தில் அதிமுக, திமுக கட்சிகள் தீவிரமாக களமிறங்கியுள்ளன. இதில் திமுக, அதிமுக கட்சிகள் மாறி மாறி ஒருவரையொருவர் தாக்கி பேசி வருகின்றனர். நேற்று அதிமுக வேட்பாளர் ஏ.சி.சண்முகத்தை இரண்டாவது நாளாக ஆதரித்து பிரச்சாரத்தில் ஈடுபட்ட முதல்வர் எடப்பாடி பழனிசாமி ஸ்டாலினை கடுமையாக விமர்சித்தார்.
திமுக இளைஞர் அணி செயலாளராக மு.க.ஸ்டாலினின் மகன் உதய்நிதி ஸ்டாலின் நியமிக்கப்பட்டதை கையிலெடுத்த எடப்பாடி பழனிசாமி திமுகவின் வாரிசு அரசியல் குறித்து பேசினார். திமுக சார்பில் வேலூர் தொகுதியில் போட்டியிடுவதும் திமுக பொருளாளர் துரைமுருகனின் மகன் கதிர் ஆனந்த் என்பதால் எடப்பாடி பழனிசாமி வாரிசு அரசியலில் திமுகவை ஒரு பிடிபிடித்தார்.
அப்போது பேசிய எடப்பாடி பழனிசாமி, வேலூர் தொகுதியில் திமுக சார்பில் வாரிசுதான் போட்டியிடுகிறார். மேலும் பல இடங்களிலும் வாரிசுகள்தான் போட்டியிட்டு வெற்றிபெற்றுள்ளனர். அதிமுகவில் எம்ஜிஆருக்குப் பிறகு ஜெயலலிதா, அவருக்குப் பிறகு நான் உங்கள் ஆதரவோடு முதல்வராகப் பணியாற்றுகிறேன். ஆனால், திமுகவில் அதுபோல முடியுமா? தற்போது ஸ்டாலினுக்குப் பிறகு உதயநிதி புறப்பட்டு விட்டார். திமுகவில் வேறு ஆட்களே இல்லையா? என கேள்வி எழுப்பினார்.