பிரபல இயக்குனர் சீனு ராமசாமி தனது படத்தில் நடிக்கும் நடிகர்களுக்கு பட்டத்தை வழங்கி வருவார் என்பது தெரிந்ததே.குறிப்பாக ’மக்கள் செல்வன்’ விஜய் சேதுபதி என்ற பட்டம் அவர் கொடுத்ததுதான் என்பது அனைவரும் அறிந்ததே.
இந்நிலையில் தற்போது தமிழக முதல்வருக்கும் அவர் ஒரு பட்டத்தை கொடுத்துள்ளார். நேற்று தமிழக முதல்வர் மு க ஸ்டாலின் அவர்களை சந்தித்த இயக்குனர் இயக்குனர் சீனுராமசாமி இதுகுறித்து வெளியிட்டுள்ள அறிக்கையில் கூறியிருப்பதாவது:
எனது திரைப்படங்களை பார்த்து, நெகிழ்ந்து, மகிழ்ந்து, ரசித்து தொடர்ந்து ஊக்கப்படுத்தி அதன் பாதையில் செல்ல உந்துசக்தியாக இருக்கும் தமிழகத்தை ஆளும் ’ஆண் தாய்’ மாண்புமிகு தமிழக முதல்வர் முக ஸ்டாலின் அவர்களை சந்தித்து வெளிவர இருக்கும் ’மாமனிதன்’ ’இடிமுழக்கம்’ ஆகிய படங்களுக்கு வாழ்த்தும் ஆசியும் பெற்று, என் கவிதை புத்தகத்தையும், அதே சமயம் தமிழகத்தில் நோயும் இயற்கை சீற்றத்திற்கு எதிராக அவர் ஆற்றிய போர்க்கால நடவடிக்கைகள் நினைவாக நன்றி கூறும் விதமாக நான் நேசித்து படித்த ஜான் ரீட் எழுதிய ’உலகை உலுக்கிய பத்து நாட்கள்’ நூலினை அவருக்கு தந்தேன்.
அவர் தன் வரலாற்று நூலின் முதல் பாகமான ’உங்களில் ஒருவன்’ நூலில் கையொப்பமிட்டு பரிசாக தந்தார். மக்கள் அன்பன் என் ’கண்ணே கலைமானே’ உதயநிதி ஸ்டாலின் அவர்கள் உடனிருந்து வாழ்த்தினார். இவ்வாறு சீனு ராமசாமி தனது அறிக்கையில் தெரிவித்துள்ளார்.
