சினிமா
குறும்படம் இருக்கு இன்னைக்கு: சேரன், மீரா விவகாரத்தை கையிலெடுத்த கமல் ஹாசன்!
கடந்த இரண்டு நாட்களாக சமூக வலைதளங்களில் பிக் பாஸ் நிகழ்ச்சியில் கலந்துகொண்டுள்ள சேரன், மீரா விவகாரம் பரவலாக பேசப்பட்டு வருகிறது. இதில் மீரா, சேரன் மீது அபாண்டமாக தவறாக நடந்துகொண்டதாக பழி சுமத்தியாதாக பெரும்பாலானோர் மீராவை திட்டித்தீர்த்தனர்.
மேலும் இந்த சம்பவத்தால் மிகவும் மனமுடைந்து போன சேரனுக்காக வரிந்துகட்டி பார்வையாளர்கள் சமூக வலைதளத்தில் விவாதித்தனர். இந்த விவதத்தின் போது அனைவரும் வைத்த இரண்டு முக்கியமான விஷயம் ஒன்று இதில் என்ன நடந்தது என பிக் பாஸ் வீட்டில் உள்ளவர்களுக்கு புரிய வைக்க குறும்படம் போட்டுக்காட்டப்பட வேண்டும். மற்றொன்று மீராவை வீட்டில் இருந்து வெளியேற்ற வேண்டும் என்பதாகும்.
சேரன் விவகாரத்தில் மீரா நடந்து கொண்டது பிரபலங்கள் மத்தியிலும் அதிருப்தியை ஏற்படுத்தியுள்ள நிலையில் நிகழ்ச்சியை தொகுத்து வழங்கும் கமல் ஹாசன் இந்த விவகாரத்தை கையிலெடுத்துள்ளார். தற்போது வெளியாகியுள்ள புரோமோவில் கமல் ஹாசன் இது தொடர்பாக பிக் பாஸ் வீட்டில் உள்ளவர்களிடம் விசாரணை நடத்துகிறார். மீராவிடம் பொடிவைத்து பேசும் கமல் அவரிடமும் என்ன நடந்தது என விளக்கம் கேட்கிறார்.
இதனை தொடர்ந்து கமல் இது தொடர்பாக குறும்படம் உள்ளதாக கூறி அனைவரையும் வியப்பில் ஆழ்த்தியுள்ளார். புரோமோவின் படி கமல் சேரனுக்கு ஆதரவாக பேசுவது போல காட்டியுள்ளது. மேலும் மீரா இந்த வாரம் வெளியேறுவதாகவும் சில தகவல்கள் படப்பிடிப்பு தளத்தில் இருந்து வருகின்றன. இதனால் இன்றைய பிக் பாஸ் நிகழ்ச்சி பார்வையாளர்கள் மத்தியில் மிகுந்த எதிர்பார்ப்பை ஏற்படுத்தியுள்ளது.