உலகம்
கிரிக்கெட் போட்டி நடந்து கொண்டிருந்தபோது திடீரென வெடித்த வெடிகுண்டு.. அதிர்ச்சியில் பாகிஸ்தான் வீரர்கள்..!
பாகிஸ்தானில் கிரிக்கெட் போட்டி நடைபெற்றுக் கொண்டிருந்தபோது திடீரென மைதானத்தின் அருகே வெடிகுண்டு வெடித்ததால் போட்டி சிறிது நேரம் நிறுத்தப்பட்டதாக தகவல்கள் வெளியாகி உள்ளன.
இந்தியாவில் ஐபிஎல் விளையாட்டு மிகப்பெரிய அளவில் பிரபலம் என்பது தெரிந்ததே. அதேபோல் பாகிஸ்தான் சூப்பர் லீக் என்ற போட்டி ஒவ்வொரு ஆண்டும் நடைபெற்று வருகிறது. இந்த ஆண்டு பிப்ரவரி 13ஆம் தேதி முதல் பாகிஸ்தான் சூப்பர் லீக் போட்டிகள் நடைபெற உள்ளதை அடுத்து தற்போது கண்காட்சி போட்டிகள் நடைபெற்று வருகிறது.
இந்த நிலையில் பாகிஸ்தானில் உள்ள நவாப் அக்பர் என்ற ஸ்டேடியத்தில் பாகிஸ்தான் சூப்பர் லீக் போட்டியின் கண்காட்சி போட்டியில் நடைபெற்றுக் கொண்டிருந்தபோது திடீரென மைதானத்தின் அருகே பயங்கர வெடிகுண்டு வெடித்தது. இந்த நிலையில் சம்பவ இடத்தில் மீட்பு பணிகள் நடைபெற்று வருவதாகவும் இந்த வெடிகுண்டு சம்பவத்தில் பலர் காயமடைந்ததாகவும் மூத்த போலீஸ் அதிகாரி ஒருவர் தெரிவித்துள்ளார்.
பாகிஸ்தான் உள்ள ஒரு தீவிரவாத அமைப்பு இந்த தாக்குதலுக்கு பொறுப்பு ஏற்றுள்ள நிலையில் இந்த தாக்குதல் பாதுகாப்பு அதிகாரிகளை குறிவைத்து நடத்தியதாகவும் முதல் கட்ட விசாரணை தெரிவித்துள்ளது.
இந்த நிலையில் இந்த தாக்குதல் நடந்த இடத்திற்கு மிக அருகில் தான் பாகிஸ்தான் கிரிக்கெட் கேப்டன் பாபர் அசாம் உள்பட பலர் விளையாடிக் கொண்டிருந்த பாகிஸ்தான் லீக் கிரிக்கெட் போட்டியின் கண்காட்சி போட்டி நடைபெற்றுக் கொண்டது. இந்த நிலையில் வெடிகுண்டு வெடித்த சத்தம் கேட்டு மைதானத்தில் உள்ள வீரர்கள் மற்றும் பார்வையாளர்கள் அதிர்ச்சி அடைந்த நிலையில் உடனடியாக போட்டி நிறுத்தப்பட்டது.
பாபர் அசாம் உள்பட கிரிக்கெட் வீரர்கள் பாதுகாப்பாக ட்ரெஸ்ஸிங் ரூமுக்கு அழைத்துச் செல்லப்பட்டனர். இதனை அடுத்து சில நிமிடங்கள் கழித்து மீண்டும் போட்டி தொடங்கப்பட்டதாக கூறப்படுகிறது.
பாகிஸ்தான் கிரிக்கெட் வீரர்களையோ, கிரிக்கெட் மைதானத்தையோ குறி வைத்து இந்த தாக்குதல் நடைபெறவில்லை என்றாலும் பாகிஸ்தானில் உள்ள கிரிக்கெட் ரசிகர்கள் இந்த வெடிகுண்டு தாக்குதல் காரணமாக கடும் அதிர்ச்சி அடைந்துள்ளதாக தெரிகிறது. இதனை அடுத்து பாகிஸ்தான் சூப்பர் லீக் போட்டி நடைபெறும் அனைத்து மைதானங்களிலும் பாதுகாப்பு ஏற்பாடுகள் பலப்படுத்தப்பட்டுள்ளதாக கூறப்படுகிறது.
