ஓடிடியில் ரிலீஸ் ஆன அண்ணாத்த! – சன் டிவி இப்படி செய்யலாமா?….

சன் பிக்சர்ஸ் தயாரிக்க சிவா இயக்கியுள்ள திரைப்படம் அண்ணாத்த. இப்படத்தில் உச்ச நடிகர் ரஜினிகாந்த் நடித்திருந்தார். இது அண்ணன் – தங்கை செண்டிமெண்ட் திரைப்படமாகும். இப்படத்தில் ரஜினியின் தங்கையாக கீர்த்தி சுரேஷ் நடித்திருந்தார். இப்படம் தீபாவளியை முன்னிட்டு நவம்பர் 4ம் தேதி வெளியானது.

எதிர்மறையான விமர்சனங்கள் பெற்றாலும் ரஜினி படம் என்பதால் இப்படம் நல்ல வசூலை பெற்றது. ஆனால், மழை வந்து இப்படத்தின் வசூலை கெடுத்தது. இதனால் சன் பிக்சர்ஸ் நிறுவனத்திற்கு சில கோடிகள் நஷ்டம், லாபத்தில் நஷ்டம் என்றெல்லாம் செய்திகள் வெளிவந்து கொண்டிருக்கிறது.

இந்நிலையில், இப்படம் இன்று நெட்பிளிக்ஸ் மற்றும் சன் நெக்ஸ்ட் ஆகிய ஓடிடி தளங்களில் வெளியாகி விட்டது. ஒரு திரைப்படம் தியேட்டர்களில் வெளியாகி 4 வாரங்கள் கழித்தே ஓடிடியில் ரிலீஸ் செய்ய வேண்டும் என சில நாட்களுக்கு முன்பு தியேட்டர் அதிபர்கள் விதிமுறையை வெளியிட்டனர்.

ஆனால், அண்ணாத்த படம் வெளியாகி 3 வாரங்களில் ஓடிடியில் ரிலீஸ் செய்துள்ளது சன் பிக்சர்ஸ் நிறுவனம். இதனால், தியேட்டர் அதிபர்கள் கடும் கோபத்தில் இருக்கிறார்களாம். சன் பிக்சர்ஸ் தயாரிப்பில் அடுத்து சூர்யாவின் ‘எதற்கும் துணிந்தவன்’ படம் வெளியாகிறது. எனவே, அதற்கு குடைச்சல் கொடுக்கலாமா என யோசித்தால், கலாநிதிமாறன் ஆளும் கட்சிக்கு நெருங்கிய உறவினர் என்பதால் அதை செய்ய முடியாது. எனவே, என்ன செய்யலாம் என யோசித்து வருகிறார்களாம்.