நாயகியாகும் உலக அழகி, படப்பிடிப்புக்கு முன்பே பிசினஸ்: அஜித்தின் ‘ஏகே 62’ படத்தின் மாஸ் தகவல்கள்!

அஜித் நடித்த ’துணிவு’ திரைப்படம் ஐந்து நாட்களில் 130 கோடி ரூபாய் உலகம் முழுவதும் வசூல் செய்துள்ளதாக தகவல் வெளியாகி உள்ள நிலையில் தற்போது அவரது அடுத்த படம் குறித்த தகவல்கள் கசிந்துள்ளதால் அஜித் ரசிகர்களுக்கு இரட்டை சந்தோசத்தை கொடுத்துள்ளது.

அஜித் நடிப்பில், வினோத் இயக்கத்தில், போனி கபூர் தயாரிப்பில், ஜிப்ரான் இசையில் உருவான திரைப்படம் ’துணிவு’. இந்த படம் கடந்த 11ஆம் தேதி விஜய்யின் ’வாரிசு’ படத்துடன் வெளியாகி மிகப்பெரிய வசூலை பெற்று வருகிறது என்பதும் குறிப்பாக கடந்த ஐந்து நாட்களில் உலகம் முழுவதும் இந்த படம் ரூ.130 கோடி வசூல் செய்துள்ளதாக கூறப்படுகிறது.

பொதுவாக அஜித்தின் படங்கள் வெளி மாநிலங்களிலும் வெளிநாடுகளிலும் சுமாரான வசூலையை தரும் என்ற நிலையில் இந்த படம் அதற்கு மாறாக மிகப்பெரிய வசூலை தந்து கொண்டிருப்பதாகவும் குறிப்பாக ’வாரிசு’ படத்தை விட பல நாடுகளில் அதிக வசூலை ’துணிவு’ பெற்றுள்ளதாகவும் கூறப்படுகிறது. அதற்கு காரணம் லைகா நிறுவனம் செய்த பிரம்மாண்டமான விளம்பரமும் ஒன்று என்பது குறிப்பிடத்தக்கது.

இந்த நிலையில் அஜித் நடிக்க இருக்கும் அடுத்த திரைப்படமான ’ஏகே 62’ என்ற படத்தின் படப்பிடிப்பு அடுத்த மாதம் தொடங்கவிருக்கும் நிலையில் இந்த படத்தின் தகவல்கள் கசிந்துள்ளன. இந்த படத்தில் அஜித் ஜோடியாக த்ரிஷா நடிக்க இருப்பதாக கூறப்பட்ட நிலையில் தற்போது முன்னாள் உலக அழகி ஐஸ்வர்யா ராய் நடிக்க இருப்பதாக தகவல் வெளிவந்துள்ளது. மணிரத்னம் இயக்கத்தில் உருவான ’பொன்னியின் செல்வன்’ படத்தை அடுத்து அஜித்தின் படத்தில் அவர் மீண்டும் தமிழில் நடிக்க உள்ளார் என்பது குறிப்பிடத்தக்கது. இதற்காக அவருக்கு மிகப்பெரிய சம்பளமாக லைகா நிறுவனம் தர இருப்பதாகவும் கூறப்படுகிறது.

அதுமட்டுமின்றி இந்த படத்தின் படப்பிடிப்பு இன்னும் தொடங்கவே இல்லை என்ற நிலையில் இந்த படத்தின் டிஜிட்டல் உரிமையை நெட்பிளிக்ஸ் நிறுவனம் பெற்றுள்ளதாகவும், அதற்காக இதுவரை நினைத்துப் பார்க்காத ஒரு தொகையை நெட்பிளிக்ஸ் நிறுவனம் லைகா நிறுவனத்திற்கு கொடுத்துள்ளதாகவும் கூறப்படுகிறது.

மேலும் இந்த படம் பான் இந்திய திரைப்படமாக உருவாக இருப்பதை அடுத்து தெலுங்கு மற்றும் பாலிவுட் முன்னணி நடிகர்கள் இணைய உள்ளதாகவும் இது குறித்து அறிவிப்பு விரைவில் அறிவிக்க இருப்பதாகவும் கூறப்படுகிறது.