தமிழ்நாடு
வேளாண் பட்ஜெட்: மதுரை மல்லி உற்பத்தியை அதிகரிக்க ரூ.7 கோடி: தேனி வாழைக்கு தனி அடையாளம்!
தமிழக சட்டசபையில் நேற்று பட்ஜெட் தாக்கல் செய்யப்பட்டது. இதனையொட்டி இன்று வேளாண் பட்ஜெட் தாக்கல் செய்யப்பட்டுள்ளது. இதில், விவசாயிகளுக்குப் பல பயனுள்ள திட்டங்களை தமிழக அரசு அறிவித்துள்ளது.
வேளாண் பட்ஜெட் (Agri Budget)
2023-2024 ஆம் ஆண்டுக்கான வேளாண் பட்ஜெட்டை நிதியமைச்சர் எம்.ஆர்.கே.பன்னீர்செல்வம் இன்று சட்டசபையில் தாக்கல் செய்தார். இந்த பட்ஜெட் குறித்து விவசாயிகள் மத்தியில் பெரும் எதிர்ப்பார்ப்பு இருந்த நிலையில், விவசாயிகளுக்கு சாதகமான திட்டங்களை தமிழக அரசு அறிவித்துள்ளது.
சிறப்பு அம்சங்கள்
- மதுரை மல்லிகைப்பூ உற்பத்தியை அதிகரிப்பதற்கு, ரூ.1004327 கோடியில் புதிய இயக்கம் செயல்படுத்தப்படும் என அறிவிக்கப்பட்டுள்ளது.
- கடலூர் மற்றும் கன்னியாகுமரி உள்ளிட்ட 21 மாவட்டங்களில் பலா சாகுபடியை அதிகரிக்க ரூ.3 கோடி நிதி ஒதுக்கீடு செய்யப்பட்டுள்ளது. அடுத்த 5 வருடங்களில் 2,500 ஹெக்டேரில் பலா சாகுபடியை உயர்த்த இலக்கு நிர்ணயிக்கப்பட்டுள்ளது.
- தேனி, அரியலூர், மதுரை, திண்டுக்கல், கரூர், தூத்துக்குடி மற்றும் திருப்பூர் மாவட்டங்களை உள்ளடக்கி முருங்கை ஏற்றுமதி மண்டலத்தில் சுமார் 1,000 ஹெக்டேரில் சாகுபடியினை உயர்த்த ரூ.11 கோடி நிதி ஒதுக்கீடு செய்யப்பட்டுள்ளது.
- கோவையில், கருவேப்பில்லையில் மகசூலை அதிகரிப்பதற்கு ரூ.2.5 கோடி நிதி ஒதுக்கீடு செய்யப்பட்டுள்ளது.
- பருத்தி உற்பத்தியை அதிகரிக்க ரூ.12 கோடி ஒதுக்கீடு செய்யப்பட்டுள்ளது.
- 60,000 சிறு, குறு மற்றும் நிலமற்ற விவசாயத் தொழிலாளர்களுக்கு வேளாண் கருவிகள் தொகுப்பு வழங்க ரூ.15 கோடி ஒதுக்கீடு செய்யப்பட்டுள்ளது.
- நியாய விலை கடைகளில் குடும்ப அட்டைதாரர்களுக்கு 2 கிலோ கேழ்வரகு வழங்கப்படும் என தெரிவிக்கப்பட்டுள்ளது.
- வண்டல் மண்ணை விவசாய நிலங்களில் பயன்படுத்த தமிழக அரசு சிறப்பு முயற்சிகள் மேற்கொள்ளும் எனத் தெரிவிக்கப்பட்டுள்ளது.
- தேனி மாவட்ட வாழைக்கு தனி அடையாளத்தை உருவாக்க ரூ.130 கோடி மதிப்பில் வாழைக்கான தனி தொகுப்பு திட்டம் உருவாக்கப்படும்.
- உயர் ரக தொழில்நுட்பங்களை அறிந்து கொள்வதற்கு 150 விவசாயிகளை இஸ்ரேல், எகிப்து, மலேசியா, நெதர்லாந்து, தாய்லாந்து மற்றும் பிலிப்பைன்ஸ் போன்ற நாடுகளுக்கு அழைத்துச் செல்லப்படுவார்கள்.
