சினிமா
விடுதலை’ படம் பார்த்து சூரி நடிப்புக்கு ரஜினி சொன்ன கமெண்ட் என்ன தெரியுமா?
‘விடுதலை’ படத்தைப் பார்த்துவிட்டு நடிகர் ரஜினிகாந்த் சொன்ன கமெண்ட் படக்குழுவை மகிழ்ச்சியில் ஆழ்த்தியுள்ளது.
எல்ரெட்குமார் தயாரிப்பில் வெற்றிமாறன் இயக்கத்தில் நடிகர்கள் சூரி, விஜய் சேதுபதி, பவானி ஸ்ரீ உள்ளிட்டப் பலர் நடித்து இருக்கக்கூடிய திரைப்படம் ‘விடுதலை’. கடந்த வாரத்தில் இந்தப் படம் வெளியாகி ரசிகர்கள் மத்தியில் நல்ல வரவேற்பு பெற்றது. துணைவன் சிறுகதையை படமாக இரண்டு பாகங்களாக வெற்றிமாறன் இயக்கியிருக்கிறார். இதன் முதல் பாகம் வெளியான நிலையில் இரண்டாம் பாகத்திற்கும் ரசிகர்கள் மத்தியில் பெரும் எதிர்பார்ப்பு உள்ளது. இதில் நடிகர் சூரியை இதுவரை பார்த்திராத வேறொரு கோணத்தில் பார்த்திருப்பதாக பலரும் தங்களது பாராட்டுகளையும் வாழ்த்துகளையும் தெரிவித்து வருகின்றனர்.
ரசிகர்கள் மட்டுமின்றி திரை பிரபலங்கள் மத்தியிலும் இந்த திரைப்படம் நல்ல வரவேற்பு பெற்று வருகிறது. இந்த நிலையில் நடிகர் ரஜினிகாந்துக்கு சிறப்பு திரையிடலை ‘விடுதலை’ படக்குழு செய்துள்ளது. படத்தை பார்த்துவிட்டு நெகிழ்ந்து போய் நடிகர் ரஜினிகாந்த் படக் குழுவினர் அனைவருக்கும் மலர்கொத்துக் கொடுத்து வாழ்த்து தெரிவித்துள்ளார். மேலும், தனது ட்விட்டர் பக்கத்தில், ”விடுதலை’ இதுவரை தமிழ் சினிமா பார்த்திராத ஒரு கதைக்களம். இது ஒரு திரைக்காவியம். சூரியின் நடிப்பு பிரமிப்பாக உள்ளது.
இளையராஜா, இசையில் என்றும் ராஜா. வெற்றிமாறன் தமிழ் சினிமாவின் பெருமை. இப்படி ஒரு படத்தை தயாரித்த தயாரிப்பாளருக்கு என்னுடைய வாழ்த்துக்கள். அடுத்து இரண்டாம் பாகத்திற்காக ரசிகர்களை போல நானும் ஆவலுடன் காத்திருக்கிறேன்’ என மனதார இந்தப் படத்தை பாராட்டி படக் குழுவினரை நெகிழ செய்து இருக்கிறார்.