தமிழ்நாடு
விசிகவில் இணைகிறாரா காயத்ரி ரகுராம்? திருமாவளவனுடன் திடீர் சந்திப்பு!
சமீபத்தில் பாஜகவில் இருந்து விலகிய நடிகை காயத்ரி ரகுராம் விடுதலை சிறுத்தைகள் கட்சி தலைவர் திருமாவளவனை நேற்று திடீரென சந்தித்தார். இந்த சந்திப்பையொட்டி அவர் விடுதலை சிறுத்தைகள் கட்சியில் இணைய அதிக வாய்ப்புள்ளதாக அரசியல் வட்டாரத்தில் பேசப்படுகிறது.
திருச்சி சூர்யா – டெய்சி இடையேயான அநாகரிகமான ஆடியோ வெளியான விவகாரத்தில் கட்சியின் கட்டுப்பாட்டை மீறி பேசியதாக காயத்ரி ரகுராம் சஸ்பெண்ட் செய்யப்பட்டார். இதனையடுத்து தன் மீதான குற்றச்சாட்டுக்கு விளக்கம் அளித்த காயத்ரி ரகுராம் கட்சியில் இருந்து விலகுவதாகவும் அறிவித்தார்.
பாஜகவில் இருந்து விலகிய பின்னர் தமிழக பாஜக தலைவர் அண்ணாமலையை டார்கெட் செய்து கடுமையான விமர்சனங்களை முன்வைத்து வருகிறார் காயத்ரி ரகுராம். இந்நிலையில் அவர் வேறு கட்சியில் இணைய வாய்ப்புள்ளதாக பேசப்பட்டது. அதே நேரத்தில் விசிக தலைவர் திருமாவளவன் குறித்தும் பாராட்டி பேசி இருந்தார். அரசியல் அனுபவத்திலும், மக்கள் ஆதரவிலும் மிகப்பெரிய தலைவராய் உள்ள திருமாவளவன் என் மனதில் உயர்ந்துவிட்டார் என தெரிவித்திருந்தார்.
இந்நிலையில் காயத்ரி ரகுராம் சென்னை அம்பேத்கர் திடலில் வைத்து நேற்று திருமாவளவனை சந்தித்தார். அப்போது காயத்ரிக்கு ‘உலக வரலாற்றில் பெண்கள்’ என்ற புத்தகத்தை பரிசாக வழங்கிய திருமாவளவன் ஏப்ரல் 14-ஆம் தேதி காயத்ரி ரகுராம் தொடங்கவிருக்கும் சக்தி யாத்ரா வெற்றி பெறவும் வாழ்த்தினார்.
இதனையடுத்து காயத்ரி ரகுராம் தனது டுவிட்டர் பக்கத்தில், ஆதரவு அளித்த விசிக தலைவர், எம்.பி., அண்ணா தொல் திருமாவளவன் அவர்களுக்கும், விசிகவுக்கும் எனது நன்றிகள். மரியாதை நிமித்தமான அற்புதமான சந்திப்பு இது என பதிவிட்டுள்ளார். இதனையடுத்து காயத்ரி ரகுராம் விசிகவில் இணைய வாய்ப்புள்ளதாக அரசியல் வட்டாரத்தில் பரவலாக பேசப்படுகிறது.