இந்தியா
மோடி என்பதே சாதி பெயர்தான்: பாஜகவை எதிர்க்கும் தம்பிதுரை!
நமது நாட்டின் பிரதமரின் பெயர் நரேந்திரன் தான் ஆனால் அவர் தனது பெயருக்கு பின்னால் மோடி என்ற தனது சாதியின் பெயரை வைத்துள்ளார் என மக்களவை துணை சபாநாயகரும் அதிமுக எம்பியுமான தம்பிதுரை தெரிவித்துள்ளார்.
அதிமுகவின் தம்பிதுரை சமீப காலமாக தொடர்ந்து பாஜகவுக்கு எதிரான கருத்துக்களை கூறி வருகிறார். முன்னதாக ரஃபேல் விவகாரத்தில் பாஜகவுக்கு எதிராக பேசிய தம்பிதுரை தற்போது பாஜக கொண்டுவந்துள்ள பொருளாதாரத்தில் பிந்தங்கியுள்ள உயர் சாதியினருக்கு 10 சதவீத இட ஒதுக்கீடு மசோதாவை எதிர்த்து பேசியுள்ளார். மோடி கொடுப்பதாக அறிவித்த 15 லட்சத்தை கொடுத்தாலே இந்த மசோதா தேவைப்பட்டிருக்காது என மக்களவையில் காட்டமாக கூறினார் தம்பிதுரை.
பின்னர் செய்தியாளர்களை சந்தித்த தம்பிதுரை, பொருளாதார அடிப்படையில் இடஒதுக்கீடு தந்தால் ஊழலும் அநீதியும்தான் ஏற்படும். சமூக நீதிக்காகத்தான் இடஒதுக்கீடு வேண்டும். சட்டத்தை இயற்றிவர்கள்கூட சாதி வேற்றுமை இருக்கக் கூடாது என்பதற்காகவே சாதி அடிப்படையிலான இடஓதுக்கீட்டை வரவேற்றனர்.
பெரியார், அண்ணா போன்ற திராவிட தலைவர்களால் தமிகத்தில் பெயருக்கு பின்னால் யாரும் சாதி பெயரை வைத்துக்கொள்வதில்லை. ஆனால் தமிழகத்தை தவிர மற்ற மாநிலங்களில் அனைவரும் தங்கள் பெயருக்கு பின்னால் சாதி பெயரை வைத்துக்கொள்கின்றனர். நமது நாட்டின் பிரதமர் நரேந்திர மோடியின் பெயர் நரேந்திரன் தான் ஆனால் அவரே சாதி பெயரான மோடியை வைத்துள்ளார் என்றார் அதிரடியாக.