சினிமா செய்திகள்
இயக்குநர் வசந்தபாலன் படத்தில் வில்லி ஆக நடிக்கும் ‘பிக்பாஸ்’ நடிகை!
இயக்குநர் வசந்தபாலன் படத்தில் வில்லி ஆக நடிக்க ஒப்பந்தம் ஆகி உள்ளார் பிக்பாஸ் நடிகை ஒருவர்.
இயக்குநர் வசந்தபாலன் தனது நண்பர்களுடன் இணைந்து ‘அர்பன் பாய்ஸ்’ என்னும் தயாரிப்பு நிறுவனத்தைத் தொடங்கி உள்ளார். இந்த நிறுவனத்தின் முதல் படத்தை வசந்தபாலனே இயக்கியும் வருகிறார். இந்தப் படத்தின் கதாநாயகன் ஆக ‘மாஸ்டர்’ படப்புகழ் அர்ஜுன் தாஸ் மற்றும் கதாநாயகி ஆக ‘சார்பட்டா’ திரைப்படத்தின் துஷாரா விஜயன் ஆகியோர் நடித்து வருகின்றனர்.
ஜிவி பிரகாஷ் இந்தப் படத்துக்கு இசை அமைத்து வருகிறார். சமீபத்தில் தான் ஜிவி பிரகாஷ் நடிப்பில் ‘ஜெயில்’ என்னும் படத்தை இயக்கி முடித்திருந்தார் இயக்குநர் வசந்தபாலன். ஆனால், புது படத்தில் இசை அமைப்பாளர் ஆக மீண்டும் வசந்தபாலன் உடன் இணைந்துள்ளார் ஜிவி பிரகாஷ்.
தற்போது இந்தப் படத்தில் வில்லி கதாபாத்திரத்தில் நடிக்க நடிகை வனிதா விஜயகுமார் ஒப்பந்தம் ஆகியுள்ளார். இதுகுறித்த அறிவிப்பை வசந்தபாலன் தனது ட்விட்டர் பக்கத்தில் வெளியிட்டுள்ளார். அதில், “நான் இயக்கும் புதிய திரைப்படத்தில் முக்கியமான கதாபாத்திரங்களில் நேர் கொண்ட பார்வை திரைப்படத்தில் எதிர்மறை கதாபாத்திரத்தில் நடித்துள்ள அர்ஜூன் சிதம்பரமும், நடிகை வனிதா விஜயகுமாரும் நடிக்கிறார்கள் என்கிற மகிழ்ச்சியான செய்தியை உங்களிடம் பகிர்ந்து கொள்வதில் பெரும் மகிழ்ச்சி” என வசந்தபாலன் குறிப்பிட்டுள்ளார்.
