தமிழ்நாடு
குடும்ப தலைவிகளுக்கு மாதாமாதம் பணம்: கமல், திமுக, அதிமுக போட்டி போட்டு அறிவிப்பு!
குடும்பத் தலைவிகளுக்கு மாதாமாதம் பணம் கொடுப்பதாக கமல்ஹாசன், திமுக மற்றும் அதிமுக ஆகிய மூன்று கட்சிகளும் அடுத்தடுத்து அறிவித்துள்ளது பெரும் பரபரப்பை ஏற்படுத்தி உள்ளது.
கடந்த சில நாட்களுக்கு முன்னர் தேர்தல் பிரச்சாரம் செய்த கமல்ஹாசன் குடும்பத் தலைவிகளுக்கு மாதம்தோறும் ஊதியம் வழங்கப்படும் என்று அறிவித்தார். அதன்பின் சமீபத்தில் திருச்சியில் நடந்த மாநாட்டில் பேசிய திமுக தலைவர் ஸ்டாலின் குடும்ப தலைவிகளுக்கு மாதம் ரூ 1000 வழங்கப்படும் என்று தெரிவித்தார். இந்த நிலையில் நேற்று தமிழக முதல்வர் எடப்பாடி பழனிச்சாமி அவர்கள் மீண்டும் அதிமுக அரசு தொடர்ந்தால் குடும்ப தலைவிகளுக்கு ரூபாய் 1500 மாதந்தோறும் வழங்கப்படும் என்றும் அது மட்டுமின்றி ஆண்டு ஒன்றுக்கு 6 விலையில்லா சமையல் எரிவாயு வழங்கப்படும் என்றும் அறிவித்துள்ளார். இந்த அறிவிப்பு பொது மக்களிடையே பெரும் பரபரப்பை ஏற்படுத்தியுள்ளது.
குடும்பத் தலைவிகளின் ஓட்டுக்களை கவர வேண்டும் என்பதற்காக கமல்ஹாசன் முதலில் அறிவித்த இந்த அறிவிப்பு பெண்களிடையே மிகப்பெரிய வரவேற்பை பெற்றதை அடுத்து திமுக மற்றும் அதிமுக ஆகிய இருகட்சிகளும் மாறிமாறி இதையே காப்பியடித்து அறிவித்து உள்ளன என்பது குறிப்பிடத்தக்கது.
இந்த இரு கட்சிகளும் கடந்த 50 ஆண்டுகளாக தமிழகத்தை ஆட்சி செய்தபோது குடும்ப தலைவிகளுக்கு பணம் வழங்கி இருக்கலாமே? என்றும் , கமல் அறிவித்த பின் இந்த கட்சிகள் அறிவிப்பது ஏன் என்ற கேள்வியும் பொது மக்கள் மனதில் எழுகிறது. இருப்பினும் வரும் தேர்தலில் பெண்களின் ஓட்டு யாருக்கு என்பதை பொறுத்திருந்து பார்ப்போம்.
