தமிழ்நாடு
விஜயகாந்த் நலமாக உள்ளாரா? என்ன ஆச்சு!
![Vijayakanth - Bhoomitoday](https://www.bhoomitoday.com/wp-content/uploads/2018/09/Vijayakanth-.jpg)
தேமுதிக தலைவர் விஜயகாந்த் கடந்த ஒரு வருடத்திற்கு மேலாக உடல் நலக்குறைவால் பாதிக்கப்பட்டு அவதியுற்று வருகிறார். பல்வேறு சிகிச்சைகளை எடுத்துக்கொள்ளும் விஜயகாந்த் நேற்று மீண்டும் மருத்துவமனையில் அனுமதிக்கப்பட்டுள்ளார்.
உடல் நலக்குறைவால் மிகவும் பாதிக்கப்பட்ட விஜயகாந்த் கடந்த மாதம் அமெரிக்காவுக்கு சென்று சிகிச்சை பெற்றார். 45 நாட்கள் அமெரிக்காவில் தங்கி சிகிச்சை பெற்ற விஜயகாந்த் சென்னை திரும்பியதும் திமுக தலைவர் கருணாநிதியின் சமாதிக்கு சென்று அஞ்சலி செலுத்தினார். அன்றைய தினம் அவர் வந்த விதம், பிரேமலதா, சுதீஷ் ஆகியோர் அவரை கைத்தாங்கலாக அழைத்து வந்த வீடியோ வெளியாகி அவரது உடல் நலம் குறித்த சந்தேகத்தை அதிகப்படுத்தியது.
இதனையடுத்து மீண்டும் சிகிச்சைக்காக விஜயகாந்த் அமெரிக்கா செல்வார் என கூறப்பட்ட நிலையில் நேற்று திடீரென சென்னை போரூரிலுள்ள தனியார் மருத்துவமனையில் சிகிச்சைக்காக அனுமதிக்கப்பட்டார். இது வழக்கமான மருத்துவ பரிசோதனை தான் என தேமுதிக தரப்பு விளக்கம் அளித்தது.
ஆனாலும் விஜயகாந்த் உடல் நலம் குறித்த வதந்திகள் தொடர்ந்து பரவியதை அடுத்து தேமுதிக சார்பில் அறிக்கை ஒன்று வெளியிடப்பட்டுள்ளது. அதில், தேசிய முற்போக்கு திராவிட கழக நிறுவனத் தலைவர், பொதுச் செயலாளர் கேப்டன் விஜயகாந்த் அவர்கள் நலமுடன் இருக்கிறார். வதந்திகளை யாரும் நம்ப வேண்டாம் என கூறப்பட்டுள்ளது.