தமிழ்நாடு
தினகரனின் அமமுக தலைமை அலுவலகத்துக்கு ஆபத்து: விடாமல் அடிக்கும் அதிமுக!
டிடிவி தினகரனின் அமமுக கட்சியை சேர்ந்த முக்கிய நிர்வாகிகளை தங்கள் பக்கம் இழுக்கும் பணியை திமுகவும், அதிமுகவும் தொடர்ந்து செய்துவருவதால் தினகரன் தொடர் பின்னடைவை சந்தித்து வருகிறார். இந்நிலையில் அவருக்கு அடுத்த செக் வைக்கும் விதமாக அதிமுக களமிறங்கியுள்ளது.
தினகரனுக்கு மிகவும் நெருக்கமானவரும் தென் சென்னை வேட்பாளராக போட்டியிட்டு தோல்வியடைந்தவருமான இசக்கி சுப்பையாவும் தற்போது தனது ஆதரவாளர்களுடன் அதிமுகவுக்கு செல்ல இருப்பதாக கூறப்படுகிறது. அவரது காண்ட்ராக்டர் தொழிலுக்கு அதிமுக தரப்பு தொடர்ந்து நெருக்கடி கொடுத்து வருவதாகவும், அதன் காரணமாக இசக்கி சுப்பையா அதிமுக பக்கம் விரைவில் தனது ஆதரவாளர்களுடன் இணைய உள்ளதாக கூறப்படுகிறது.
இதனால் அமமுக தலைமை அலுவலகத்துக்கு ஆபத்து வந்துள்ளது. தற்போது தினகரனின் அமமுக தலைமை அலுவலகம் இருக்குமிடம் இசக்கி சுப்பையாவிற்குச் சொந்தமானது. சமீபத்தில் அக்கட்சியின் பதிவு பற்றி நாளிதழ்களில் வந்த விளம்பரத்தில் கூட தலைமை அலுவலகம் என்ற பெயரில் 10, டாக்டர் நடேசன் தெரு, அசோக் நகர், சென்னை-83 என்ற முகவரி தான் வெளியிடப்பட்டுள்ளது.
இசக்கிய சுப்பையாவை திமுக பக்கம் இழுக்கவும் தங்க தமிழ்செல்வன் முயன்று வருவதாக கூறப்படுகிறது. இசக்கி சுப்பையாவும் அமமுகவில் இருந்து வெளியேறி விட்டால் அக்கட்சியின் தலைமை அலுவலகம் அதே இடத்தில் இயங்குமா அல்லது புதிதாக வேறு ஒரு இடத்திற்கு மாற்றப்படுமா என்ற கேள்வி எழுந்துள்ளது.